2021 йил 10 январь куни Қозоғистон Республикасида ҚР Парламенти Мажлиси ва барча даражадаги маслаҳатлар депутатларининг сайлови ўтиб, натижалар чиқарилди. 

Шу муносабат билан Туркистон вилоят сайлов комиссиясининг раиси А. Ўмиралиев сайлов натижаларига бағишланган матбуот анжумани ўтказди.

– Авваламбор, барча фуқароларни юртимиз учун муҳим бўлган сиёсий жараён қонун талабларига мос равишда ўтказилгани билан қутлайман, – деди Алибек Каденули. – Вилоятдаги сайловчилар рўйхатда 1163196 кишини ташкил этган бўлса, 763454 фуқаро сайлов участкаларига бориб, ўз конституциявий бурчларини адо этди. Бу сайловда бешта сиёсий партия («Қозоғистон Халқ партияси», Nur Otan, «Ауыл», “Ақ жол”, “Адал”) вакиллари қатнашиб, уларнинг партиявий рўйхатлари асосида маслаҳат депутатлари сайловига жами 833 номзод қатнашди.

Вилоят, туман ва шаҳар бўйича мандатларнинг тақсимоти қуйидагича бўлди:

вилоят маслаҳатига – 45 мандат, шаҳар маслаҳатларига – 47 мандат, туман маслаҳатларига – 228 мандат. 

Сиёсий партиялар орасида барча маслаҳатларга депутатлик мандатлари қуйидагича тақсимланди:

«Қозоғистон Халқ партияси»га – 1 мандат, Nur Otanга – 263, «Ауыл» – 32, “Ақ жол” – 24. “Адал” мандат ололмади. 

Ўртача бир мандатга 2,5 номзоддан тўғри келди.

13 январь куни овоз бериш натижалари билан мандатга эга бўлган сиёсий партиялар номзодларининг рўйхатлари вилоят сайлов комиссиясига тақдим этилди. 

14 январда эса қарор қабул қилиниб, 15 январь куни соат 10.00да вилоят маслаҳатининг 7 чақириқ биринчи сессияси каминанинг раҳбарлигида очилади ва янгидан сайланган маслаҳат депутатлари таништирилади, уларга депутатлик гувоҳномалари ва махсус нишонлар тақдим этилади. 

Матбуот анжуманида айтилишича, вилоят маслаҳати учун тарқатилган бюллетенларнинг 15287таси (2,04 фоиз) яроқсизлиги аниқланган. Энг кам овоз “Ауыл” партиясига тегишли. Энг кўп овоз эса – Nur Otanники.