Ҳурматли жанубийқозоғистонликлар!

Сизларни Астана куни байрами билан чин дилдан қутлаймиз!

Давлат раҳбари Н. Назарбаевнинг янги пойтахт пойдеворини ўрнатиш ғояси элимизнинг халқаро майдондаги нуфузини юксалтиришга асос бўладиган тарихий қарор.

Астана куни – нафақат пойтахт фуқароларининг, балки бутун халқимизнинг байрами. Сабаби, Астана – ҳар бир қозоғистонликнинг қувончи, фахри, ғурури. Тарихий жиҳатдан олганда қисқа муддат ичида Қозоқ элининг гавҳар шаҳри – Астана ўз номини мустақиллик шажарасига олтин ҳарфлар билан битди.

Президент Н. Назарбаев янги шаҳар барпо этиш орқали бир томондан иқтисодиётни тараққий эттириб, халқнинг онггини уйғотиб, келажакка ишонч орттириш мумкинлигини, иккинчи томондан пойтахтни республиканинг географик марказига кўчиришнинг миллий хавфсизлик жиҳатидан самарали эканини олдиндан баҳолай билди. Оқил сиёсатчининг доно қарори тўғри эканини бугун вақтнинг ўзи исботлади. Астана Элбошининг жасорати, миллатимизни, давлатчилигимизни далили бўлган ажойиб шаҳарга айланди.  

Бугунги кунда Қозоғистон Астана мутаносиблигида дунёнинг тўрт тарафи – Ғарб билан Шарқнинг, Жануб билан Шимол маданиятларини бирлаштирувчи давлатга айланди.

Қозоғистоннинг ёш пойтахти, бугунги Астана – ривожланган мамлакатнинг, мангу дўстликнинг рамзига айланди. Бу ерда жаҳон миқёсидаги саммит ва анжуманлар ўтказилиб келинмоқда. Улардан бири – шу кунларда Астанада ўтаётган ЭКСПО – 2017 халқаро ихтисослаштирилган кўргазмаси. Келажак энергияси мавзуида ўтаётган кўргазма давлатимизни фан чўққисига етаклаб, Астанани дунёга машҳур этмоқда.

Ҳурматли жанубийқозоғистонликлар!

Сариарқанинг тўрида ўрнини топган гўзал шаҳар Астананининг таваллуд айёми муборак бўлсин! Есил соҳилида бўй кўтарган, чиройда тенги йўқ шаҳар, орзулар шаҳри Астана гуллаб-яшнаб, жаҳоннинг дурдонасига алансин.