Туркистонда Ўзбекистоннинг Artel компанияси 1 миллионтагача газ плиталари ишлаб чиқаради. Бу ҳақда Туркистон вилояти ҳокими Ўмирзак Шўкеевнинг Ўзбекистонга хизматсафари чоғида маълум қилинди.

 Вилоят ҳокимининг Тошкент шаҳар ҳокими Жаҳонгир Ортиқхўжаев билан учрашуви чоғида Қозоғистон ва Ўзбекистон маиший техника ишлаб чиқарадиган қўшма корхона очиш тўғрисида ҳужжатлар имзоланди. Қўшни мамлакат сармоядорлари Туркистон саноат минтақасида газ плиталари ва сув иситгичлари ишлаб чиқаришни режалаштирмоқдалар. Лойиҳа доирасида 2000 дан зиёд янги иш ўрни яратилади. Ускуналар нархи истеъмолчилар учун ҳам қулай бўлади. Туркистон вилояти ҳокими лойиҳани амалга оширишда ҳокимият ҳар томонлама қўллаб-қувватлашини таъкидлади. 

– Дўстона муносабатларга асосланган Қозоғистон-Ўзбекистон ҳамкорлиги мустаҳкамланмоқда. Бугунги лойиҳа– ҳамкорлик фаолиятимизнинг дебочаси. Умуман олганда, ўзбекистонлик сармоядорлар Туркистонда бир нечта ишлаб чиқариш корхоналари очишдан манфаатдор, –деди Ўмирзак Шўкеев. 

Artel компанияси Туркистон вилоятида ошхона плиталари, электр ускуналари ишлаб чиқарадиган завод қуради. Таъкидлаш жоизки, ўтган йилнинг охирида компания вакиллари сармоявий муҳит, саноат минтақасидаги сармоядорлар учун иқтисодий имкониятлар билан танишиш мақсадида Туркистонга ташриф буюришган эди. Бундан ташқари, вилоят ҳокими Ўмирзак Шўкеев Ўзбекистонга ташрифи давомида Чиноз туманига бориб, «Qojakent Textile» компанияси тикувчилик фабрикасининг очилиш маросимида иштирок этди.