Захирадаги зобит Султонбек Давронбеков ташаббуси билан Тоғойна қишлоғида Бодом ўзанидан ўтадиган 50 метр узунликдаги битта автомашина сиғадиган кўприк ҳашар йўли билан қурилмоқда. У фойдаланишга топширилгач, қишлоқ аҳли 10 чақиримли айланма йўл азобидан фориғ бўлади. 

Эзгу ташаббусни 1 Мамир қишлоғи ҳокими Нурғали Қўсалиев ҳам қўллаб-қувватлади.

Таъкидлаш жоиз, бу қишлоқда илгари давлат дастури доирасида автомашиналарга мўлжалланган кўприк қурилмаган. Ушбу ҳудудда жойлашган осма кўприк ҳам таъмирга муҳтож.

Ташкилий ишларга Шукрулло Назаров бош-қош бўлмоқда. Ҳомийлар – Неъмат Саъдуллаев, Собир Қоратоев техникаси билан ёрдам кўрсатмоқда.

– Йўл билан йўлни, эл билан элни бир-бирига яқин қилувчи, яёв бўлсангиз ҳам, уловда юрсангиз ҳам изингиз, кўзингиз қадаладиган қадамжо – кўприкдир, – дейди Давронбек Абдужалил ўғли. – Шу сабабли бўлса керак, кўприк қураётганимизни айтганимда, дўстларим, яқинларим, катта-кичик идора раҳбарлари, ҳатто мен танимайдиган одамлар ҳам ёрдамини аямаяпти. Иш бошлангач, Сариоғоч шаҳрига бориб, Қайрат Пазилов берган 8та 12 метрли темир-бетон конструкцияли тўсинни олиб келиш учун йўлга чиқдик. Сайрам даҳасининг Октябрь мавзесида истиқомат қиладиган ҳайдовчи йигитни учратиб қолдим. Танишиб олдик. Исми Одилшиқ экан. У тўсинларни узунлиги 14 метрли КамАЗ машинасида мақбул баҳода қишлоққа етказиб берди. 

«Стандартцемент» корхонаси (Бауржан Сеитжанов) 20 тонна цемент, «ЖБИ №1» МЧБ (Фания Аҳмаджон қизи) плита, FERRUM VTOR муассиси Абдурашит Ўмаров – 2 тонна арматура, «Шимкент металл Альфа» МЧБ (Ирисметов Араббек) – труба, «Балмуздақ МЧБ – 40та контейнер, «КазМедПром» МЧБ директори Жўмарт Жақсибаев – 100 минг тенге, «Электрокомплекс» МЧБ раҳбари Лукьянов Юрий Анатольевич электр пайвандлаш воситалари билан ёрдам берса, «Тассат» МЧБ (раҳбари Жамолбек Тўламетов) ва хусусий тадбиркор Ҳаётулла Тўламетов шағал ва қум етказиб берди. 

Шукрулло Назаров, Ҳамза Темиров, Раҳимжон ҳожи, Азизбек Рўзиматов, Раъно Юнусова ва қишлоқ ёшлари ҳам баҳоли қудрат ёрдам кўрсатмоқда.