Туркистон шаҳрида 1 март – Шукрона куни муносабати билан минтақадаги этномаданият бирлашмалари вакиллари ва зиёлилар иштирокида тадбир ўтди. 

Унда вилоят ҳокимининг ўринбосари Сакен Қалқаманов ушбу байрамнинг моҳиятига тўхталди.

– ҚР Тўнғич Президенти – Элбоши Н. Назарбаев 2016 йил 14 январь куни Қозоғистон халқи Ассамблеяси ташкил топган кунни Шукрона куни деб таклиф қилди ва шу йилдан эътиборан байрам сифатида нишонлаб келинмоқда. Қозоғистонга кўчиб келган турли этнос вакилларини қозоқ халқи қучоқ очиб қарши олди. Шу боис, ушбу кунни тарихга таъзим куни деб уққанимиз маъқул. Бугунги кунда этнослараро тотувликнинг қозоғистонча андазасини дунё тан олган. Юздан зиёд этнос вакиллари бир чанғароқ остида бирлик, тотувликда элимиз фаровонлиги йўлида меҳнат қилмоқда, – деди Сакен Амангелдиули.

Шунингдек, тадбирда вилоят тожик этномаданият бирлашмаси раиси Йўлдош Султонов ва славян этномаданият бирлашмаси раисаси Марина Лимаренко дил сўзларини билдиришди. 

Тадбирда Қозоғистон халқи Ассамблеяси аъзолигига вилоятдан сайланган фуқароларга гувоҳнома топширилди. Байрам тадбири Қозоғистон халқи Ассамблеясининг “30 эзгу иш” хайрия тадбири билан бошланди, у вилоят миқёсида йил бўйи давом этади.