Шимкентда Пойтахт куни кенг кўламда нишонланди. Байрам тадбирининг дастлабки қисми 5 июль куни бошланди. 

Дастлаб, Абай номидаги исти­роҳат боғида рассомлар кўргазмаси уюштирилди. Мўйқалам усталари кўргазма меҳмонларига Астана шаҳрига бағишланган ижод наму­наларини ҳавола этишди. С. Бай­тереков номидаги хиёбонда ижодий жамоалар байрам концерт дастурини намойиш этишди.

6 июль – байрам дастурининг иккинчи қисми тадбирларга бой бўлди. Ташкилотчилар дастурга ўз­гача ёндашиб, эрталабки вақтни ёшларга, куннинг ўрта қисмини ўсмир­ларга бағишласа, оқшом пайтида шаҳарликларга катта концерт дастури ҳавола этилди. 

Шимкент ҳайвонот боғи жа­моа­си болаларга ажойиб туҳфа ҳозир­лашди. Шу куни очиқ эшиклар куни уюштирилиб, “Астана” лақаб­ли жирафанинг туғилган куни ни­шонланди. Ҳайвонот боғига таклиф этилган эртак қаҳрамонлари, қў­ғирчоқлар болаларга ажойиб дақи­қаларни ҳадя этишди. 

Жирафанинг атрофига жамланган болалар олдиндан тайёрланган сов­ға – мева ва сабзавотлардан иборат тортни кеча қаҳрамонига уза­тишди. Серсув мевалардан кўра, қайрағоч баргларини маъқул кўрган жирафанинг таваллуд куни шундай тўйланди.

“Шымкентплаза” савдо уйи олдида “Ақсу” лагерида ёзги дам олишни ўтказаётган 120 нафар йигит-қиз Астанани ўзларининг ўйинлари (флешмоб) билан қутлашди. 

Марказий истироҳат боғида очиқ кутубхона ташкил этилиб, ўқувчиларга Астанага бағишланган китоблар тавсия этилди. Асосий саҳнада оқинлар пойтахтга оид термаларни ижро этса, ёш рассомлар Ватанни мадҳ этувчи асарлари билан дастур қатнашчиларини хушнуд этишди. 

Оқшом чоғи Ал Форобий номли майдонда катта концерт дастури уюштирилиб, унда маҳаллий санъат­корлардан ташқари, пой­тахт­дан ташриф буюрган М. Ауелбекова ва “Алау” гуруҳи иштирок этди.