Вилоятимизда Астана куни байрами арафасида “Асқақтай бер, Астана!” номли тантанали мусиқий байрам уюштирилди. 

Тадбирда вилоят ҳокими Жансейит Туймебаев барча жанубийқозоғистонликларни Астана куни билан қутлаб, пойтахтимизнинг 20 йилда эришган муваффақиятларига тўхталди.

– Барчани Астана куни билан чин дилдан табриклайман! Элбоши Нурсултан Абишули Назарбаевнинг 23 йил муқаддам кўтарилган пойтахтни алмаштириш ташаббуси Мустақилликнинг энг қийин даврларига тўғри келди. Унинг бу ғоясини кўпчилик тўлиқ қўллаб-қувватламади. Аммо, оқил сиёсатчига хос қатъийлиги туфайли у барчани ишонтира билди. Президентимизнинг узоқни кўра билиши, донолигини айнан бугунги кун исботлаб берди, – деди Ж. Туймебаев.

Сўнг вилоят ҳокими қатор фуқаролар кўксига “Вилоятга кўрсатган хизматлари учун” кўкрак нишонини тақди. Улар сафида вилоят мудофаа ишлари департаменти раҳбари Талғат Алиқулов, вилоят суди раиси Талғат Баратбеков, Давлат хизмати ишлари ҳамда уюшган жиноятчиликка қарши ҳаракат агентлиги раиси Али Кўмекбаев каби фуқаролар бор.

Байрамона тадбир концерт дастури билан давом этди. Астана кунига бағишланган “Арнау” композицияси, қозоқ тарихидан дарак берувчи “Элбоши”, “Сариарқа” куйлари миллий асбоблар оркестри томонидан ижро этилди.

Байрам Н. Назарбаевнинг сўзига ёзилган Б. Тилеуханнинг “Елім менің” қўшиғи билан якунланди.