Шимкент шаҳрининг Сайрам даҳасидаги 12-шифохона социологи Матлуба Абдураимованинг қувончи чексиз – бирга меҳнат қилаётган 7 нафар социолог ва 6 руҳшунос режаси бугун амалга ошди. 

Қоратов туман ҳокимлиги Сайрам бўлими, ўзбек этномаданият бирлашмаси ҳамда вилоят ўзбек драма театри ҳамкорликда уюштирган ибратли тадбирга 274 нафар ногирон бола таклиф этилди.

Этномаданият бирлашма раҳбарлари Файзаҳмад Нурметов, Каримқул Пўлатбоев ва Тамара Ботирхоновалар концерт олдидан болажонларга саломатлик, кўнгилли ҳордиқ тилашди. Сўнг, театр актёрлари Баҳром Искандаров ва Эрали Тўламетовлар ҳамда театр хизматчилари Шоира Ниёзхон қизи, Муборак Тошметова, Собир Абдуллаев, Жамила Абдулҳасанова, Каромат Норова ва бошқалар ишга киришиб, байрамнинг мазмунли ўтиши учун жон куйдирдилар.

 Шунингдек, тадбиркорлар Абдулла Шамшиметов, Раҳимжон Адлшиқов ва Тўлқин Усмоновлар кичкинтойларни музқаймоқлар билан сийлашди. 

Тасвирда: ногирон болаларга бағишланган тадбирнинг очилиш маросимида.