Вилоят ҳокими “Қазмедприбор” фаолияти билан танишди Вилоятимиз соғликни сақлаш соҳаси учун замонавий тиббиёт ускуналари ва жиҳозлари ишлаб чиқаришда республикада пешқадам, десак муболаға бўлмайди. Мамлакат аҳолисини арзон ва сифатли тиббиёт буюмлари билан таъминлаётган “Kazmedpribor Holding” МЧБ фаолияти билан яқиндан танишган минтақа раҳбари Жансейит Туймебаев корхонада ишлаб чиқарилаётган маҳсулотларнинг сифатига юқори баҳо берди. Айтиш жоизки, мазкур корхона 2005 йилда “Бизнеснинг йўл харитаси – 2020” давлат дастури доирасида очилганди. Бугунги кунда корхона рентген жиҳозлари ва тиббий ускуналар ишлаб чиқариб, доривор маҳсулот етиштириш билан шуғулланади. Халқаро андазалар сертификатига эга завод юртимиздаги касалхоналарни УТТ ускунасидан бошлаб, жарроҳилик бўлимига керакли жиҳозларгача тўлиқ таъминламоқда. Сўнгги намунадаги инновациявий лойиҳаларни амалга ошириш учун корхона Япония, Испания, Корея сингари тараққий этган давлатларнинг заводлари билан тиғиз алоқа ўрнатган. Бу ерда 150 нафар ишчи-хизматчи меҳнат қилмоқда. – Корхонанинг иши барқарор. Маҳсулотларига талаб кучли. Бу ерда ясалган ускуна-жиҳозлар чет элникидан қолишмайди. Давлат томонидан қўллаб-қувватланаётган заводнинг салоҳияти юқори, шу сабабли даромади катта. Энг асосийси – корхона раҳбарияти изланиш ва ҳаракатда, – деди Ж. Туймебаев. Бугунги кунда “КазМедПрибор” корхонасида 400 турдан зиёд тиббиёт ускуналари ва жиҳозлари ишлаб чиқарилмоқда. Умуман, завод йилига 60 минг дона тиббий жиҳоз чиқариш қувватига эга. Шунингдек, бу ерда тез тиббий ёрдам машинасига керакли ускуналардан ташқари, электрокардиографлар, тиббий мониторлар ясалади. Сифатли ва арзон маҳсулотларга талаб йил сайин ортиб бормоқда. Ҳатто, Россия, Ўзбекистон, Тожикистон ва Туркманистондан ҳам буюртмалар туша бошлабди.