Жанубий Қозоғистон вилоятидаги “Аsiа Тrafo” МЧБда қуввати 110-120 кВтли юқори кучланишли транс­форматорлар ишлаб чиқариш кўзда тутил­моқда. 2016 йилдан буён қурилаётган иншоотни ишга  тушириш  2018 йилнинг иккинчи яримига мўлжалланган. 

“Тассай” индустриявий минта­қасида жойлашган қурилиш лойиҳаси жараёни билан  вилоят ҳокими Жансейит Туймебаев махсус танишиб, ишларга ижобий баҳо берди. 

– Келгуси йили завод ишга туширилса, 220 кишини доимий  иш билан таъминлаш имконияти  туғилади. Бу жуда яхши. Энг асо­сийси – ҳозирги кунда корхонада бажарилаётган ишларга ижобий баҳо бериш мумкин.  Шу боисдан ишни режа асосида юритиб, заводни эртароқ ишга туширишга эътибор қаратган маъқул, – деди Ж. Туймебаев.

Таъкидлаш жоизки, бу ишлар тадбиркорлик ташкилотларини қўллаш харитаси доирасида амал­га оширилмоқда. Лойиҳа қиймати 17,5 млрд. тенгени ташкил этади. Завод йилига 120 трансформатор чиқариш қувватига эга.

– Завод маҳсулотлари Қозо­ғистон ва  МДҲ давлатларини қа­ноат­лантиради, деб кутилмоқда. “Ишлаб чиқариладиган маҳсулот хориж корхоналарига ҳақиқий рақобатбардош бўла олади”, – дейди мутахассислар. Шу­нинг­­дек, “Аsiа Trafo” МЧБ ўз маҳсулотларининг 50 фоизини МДҲ давлатларига экспорт қилишни режаламоқда. Заводда “High volt”, “Knutch”, (Германия), “Tubolу astronic”, “Mika fluіt”, (Швейцария),  “Hikon” (Хорватия) ҳамда бошқа (Туркия, Хитой) фир­маларнинг ускуналаридан фойдаланилмоқда.