Юртимизда мулк, шу жумладан, меросхўрлик Қозоғистон Республикаси Конституциясининг 26-модда 2-бандига кўра қонун билан ҳимояланган.
Меросхўрлик – қадимий ҳуқуқий соҳанинг бир қисми бўлиб, жамиятнинг ижтимоий-ҳуқуқий тарзини белгилайди. Меросхўрлик ҳуқуқи энг барқарор ҳуқуқий институт ҳисобланади. Қадимда, масалан, ота вафот этса, унинг мол-мулки фарзандларига ўтган. Уни тақсимлашда муаммолар пайдо бўла бошлагач, меросни васиятнома орқали қолдириш одатга айланди.
Мерос сўзи «Виросатун» сўзидан олинган бўлиб маънавий ёки молиявий ҳаққа эга бўлиш дегани. Яъни, бирон нарсанинг бир шахсдан бошқасига ўтишидир. Шу маънога кўра, “Мерос” мол, бойлик, илм, улуғликни ўз ичига олади.
Қуйида Жанубий Қозоғистон вилоят судининг судьяси С. Жақсилиқов мавзуни давом эттиради.
Мерос икки хил тартибда бўлади: қонун ёки васиятнома асосида. Қонун бўйича меросхўрлик мулк эгаси вафот этганидан кейин ўзига тегишли хусусий мулкни маълум бир шахсга ўтказиши белгиланмаган ҳолларда вужудга келади.
Васият бўйича меросхўрлик тайинланганда мерос қолдирувчининг ҳуқуқ ва мажбуриятлари меросхўрлар ўртасида тақсимланади, шунингдек, ворисларни белгилаш тартиби фақатгина мерос қолдирувчининг эрки билан амалга оширилади.
Меросга эгалик қилиш учун нима қилиш керак?
Қозоғистон Республикаси Маъмурий кодексининг 1076-моддасига биноан, мерос очилган жойдаги давлат нотариуси меросхўрларнинг ёзма аризаларига кўра, меросга бўлган ҳуқуқ тўғрисида гувоҳномалар беради. Меросни қабул қилиш ҳақидаги аризалар нотариуслар томонидан тегишли тартибда тасдиқланган бўлиши лозим.
Меросхўрлик фуқароларнинг ўлими ёки унинг суд томонидан вафот этган, деб эълон қилиниши натижасида очилади.
Меросга бўлган ҳуқуқ тўғрисидаги гувоҳнома мерос очилган кундан эътиборан 6 ой ўтгандан кейин берилади.
Васиятнома қонунда белгиланган тартибда ёзилиб, уни нотариус тасдиқлаши керак.
Мерос қолдирувчи уни олувчига айрим мажбуриятларни юклашга ҳақли. Масалан, уйдан фойдаланган ҳолда, ундаги расмларни музейга тақдим этишини сўраб ёзилган васиятномалар кузатилган.
Меросни тақсимлаш масаласига келсак, меросхўрларнинг келишувига кўра ўзларига тегишли улушларга мувофиқ, келишувга эришилмаган тақдирда эса, суд тартибида амалга оширилади. Меросхўрлардан исталган бири меросни қабул қилиб олган шахсдан қонун бўйича мероснинг тақсимланишини талаб қилишга ҳақли.
Васиятноманинг маълум бир андазаси тасдиқланмаган. Чунки васиятнома унинг муаллифининг ўз хоҳиш-иродасидан келиб чиққан бўлиб, матн мазмуни ҳам шунга мувофиқ бўлади.
Меросхўрдан қандай ҳужжатлар талаб қилинади?
* Меросга эгалик қилиш сўраб ёзилган ариза;
* мерос қолдирувчининг вафоти ҳақида гувоҳнома;
* никоҳ гувоҳномаси (агар мерос қолдирувчи ва олувчилар эр-хотин ҳисобланса);
* барча фарзандларнинг туғилганлик ҳақида гувоҳномаси (агар қиз фарзанднинг турмушга чиққач фамилияси ўзгарган бўлса, никоҳдан ўтганлик ҳақида гувоҳнома) ;
* мерос қолдирувчининг яшаш жойидан маълумотнома ва уй дафтаридан кўчирма;
* уй мерос қолдирилаётган бўлса, давлат кадастр корхонасидан маълумотнома;
* мерос банк ҳисоб рақамидаги пул бўлса, банк омонат дафтарчаси;
* мерос автомашина бўлса, техпаспорти;
* ҳар бир шахснинг паспорти (гувоҳномаси)
Агар васиятнома қолдирилмаган бўлса-чи?
У ҳолда мерос қонунда белгиланган навбат бўйича тақсимланади:
1. Фарзандлари, хотини, ота-онаси, невара-эваралари.
2. Ака-ука, опа-сингиллари, бува-бувиси, жиянлари.
3. Амаки-тоғалари, амакивачча-холалари.
4. Катта бува-бувилари, жиянлари, амакивачча, холаваччаларининг фарзандлари.
Агар бундай яқин қариндошлари бўлмаса, ўгай ака-укалар, опа-сингиллари қолдирилган мулкка эгалик қилишлари мумкин. Лекин, улар меросхўр билан бирга камида 10 йил яшаган бўлишлари керак.
Савол:
– Янги қурилаётган ёки қурилган уй-жойлар расмийлаштирилмаган бўлса, васиятномада кўрсатилган бўлишига қарамай, унга эгалик қилиш ҳуқуқи бериладими?
Жавоб:
– Мерос қолдирувчи вафот этгунига қадар тегишли тартибда расмийлаштирилмаган уй, далаҳовли, гараж ва бошқаларга нисбатан тузилган васиятнома кучга эга бўлмайди.
Ушбу бино ва иморатларга нисбатан мерос қолдирувчининг вафотидан сўнг тегишли ҳокимлик ёки суд томонидан мерос қолдирувчи номига эгалик ҳуқуқи белгилансагина мерос очилган бўлиб ҳисобланади.
Олдиндан ошкор этилмайди
Нотариус васиятномани тасдиқловчи бошқа мансабдор шахс, шунингдек, васият қилувчининг ўрнига васиятномани имзолаган фуқаро мерос очилгунга қадар васиятноманинг мазмунига, унинг тузилиши, бекор қилиниши ёки ўзгартирилишга оид маълумотларни ошкор қилишга ҳаққи йўқ.
Нотариус хизмати қанча туради?
Албатта, нотариус хизмати бепул эмас. Васиятни тасдиқлаш – 6363 тенге, меросхўрлик тўғрисидаги гувоҳномани бергани учун 8484 тенге тўланади.
Динимизда
Нўъмон ибн Башир розияллоҳу анҳудан ривоят қилинади: «Отам мени Расулуллоҳ соллаллоҳу алайҳи васалламнинг ҳузурларига олиб бордилар ва: «Эй, Аллоҳнинг Расули, гувоҳ бўлинг, мен Нўъмонга ўз молимдан буни бердим», деди. «Ҳамма ўғилларингга, шунга ўхшаш бердингми?» дедилар у зот. «Йўқ», деди. «Бунга мендан бошқани гувоҳ қил», дедилар ва сўнгра: «Сени уларнинг барчаси сенга бирдек яхшилик қилиши хурсанд қиладими?» дедилар. «Ҳа», деди. «Ундоқ бўлса, йўқ!» дедилар». Бошқа бир ривоятда: «Аллоҳга тақво қилинглар ва фарзандларингиз орасида адолатли бўлинглар», дейилган. (“Мерос китоби”дан).