Жануб ёшларига шимолий вилоятларда бепул ўқишга имконият берадиган “Серпiн” лойиҳасига ҳужжат қабул қилиш бошланди. 

Бу йил лойиҳа доирасида Шимолий, Шарқий, Ғарбий Қозоғистон, Ақтўбе, Ақмўла, Қўстанай, Павлодар, Қарағанди, Атирау вилоятларидаги юқори ҳамда махсус ўрта ўқув юртларига 4 513 грант ажратилган. 

Айтиш жоизки, бугунги кунда Жанубий Қозоғистон вилоятидан 5 627 ёш йигит-қиз шу лойиҳа бўйича билим олмоқда. Дастлабки иштирокчилар диплом олиб, ишга жойлашган.

Лойиҳага кўра, аҳолиси зич жойлашган жануб ёшларига бепул билим олиб, ўз мутахассислиги бўйича ишга жойлашиш имконияти берилади. Бу тадбир ишсизлик, болалар боғчалари, мактаб етишмаслиги муаммолари ва бошқа қатор ижтимоий масалаларнинг ижобий ҳал бўлишига ёрдам беради.Энг асосийси, аҳоли сийрак жойлашган шимолий минтақалар жанубликлар билан кўпаяди.

Айтиш жоизки, сўнгги уч йилда 9 минтақага – Шимолий, Шарқий, Ғарбий Қозоғистон ва Ақтўбе, Ақмўла, Қўстанай, Павлодар, Қарағанди ҳамда Атиров вилоятларига 5 627 битирувчининг 4 698 нафари олий ўқув юртларига ўқишга кирса, 929 талаба коллежларда таълим олмоқда. Яъни, 2014 йили “Серпін-2050” дастури доирасида олий ўқув юртларига 1 050 грант ажратилиб, 540 талаба ўқишга кирса, 2015 йили 5000 грант ажратилиб, минтақамиздан 2 580 битирувчи ўқишга кирган. 2016 йили 3 162 грант ажратилиб, 1 578 нафар талаба грант соҳиби бўлган.