Август ойи мевали дарахтларни куртак пайванд қилиш учун қулай палла. 

Куртак пайванд қилишдан 3-4 кун олдин ўсимлик қондириб суғорилиши керак.

Куртак пайванд қилинадиган пайвандтагнинг илдизидан юқори 20-30 см. оралиғидаги майда шохлари олиб ташланади. Пайвандтаг пўстлоғи лой ва чангдан ҳўл латта ёрдамида тозаланади. 

Пайвандтаг танасининг кунчиқиш томонидаги силлиқ қисми қобиғи 3 см. узунликда Т шаклида кесилади (В расм). Кесилган жойга ўрнатиш учун танланган дарахт новдасидан (А) куртак юпқа ёғочли қисмини қўшиб, 3 см. узунликда кесиб олинади (Б) ва пайвандтагнинг Т шаклдаги қисмига жойлаштирилади (Г). Бунинг учун Т шаклдаги қисмининг пўстлоғини ўнг ва чап томонларини бироз ёғочликдан кўчирилиб (Д), куртак ўрнатиш учун жой очилади. Шу жойга куртак жойлаштирилгач, ўнг ва чап томонидаги қобиқ бармоқлар билан пастдан юқорига қараб босиб жипслаштирилади. Сўнгра куртакнинг устки қисмидан пастга қараб плёнка (эни 1,5 см. бўйи 30 см.) билан ўраб чиқилади. Плёнка ўралганда куртак ва ундаги барг банди ўралаётган плёнка орасида (Ж) очиқ қолдирилиши керак. Плёнка ўралишида пайванд қилинган қисмининг ичига ҳаво кирмайдиган жипслик ҳосил бўлиши зарур. Пайванд қилинган куртак 15-16 кунда пайвандтагга бирлашиб кетади. Куртакнинг тутганлиги аниқлангач, плёнка олиб ташланади.

Куртакнинг қишдан омон чиққанлигига амин бўлгач, баҳорда пайвандтагнинг куртакдан юқори қисми кесиб ташланади.