Туркистоннинг Югнак қишлоғидаги Фарҳод Абдуллаев асос солган йирик хўжалик «Жанубий Қозоғистон»нинг доимий ҳамкори саналади. У майда хўжаликларни бирлаштириш негизида, давлатимизнинг лизинг асосида алп техникани деҳқонларга бериш имтиёзидан самарали фойдаланмоқда. Ушбу хўжаликда ғалла, маккажўхори, маҳсари, бошоқли дон экинларининг барча турларини исрофсиз йиғиштириб оладиган замонавий комбайнлар бор. Ҳатто бошқа хўжаликлар эплай олмаган, бузилса тузалмаган замонавий мураккаб техника шу хўжаликда қайта таъмирланиб, халқ манфаати йўлида қўлланилмоқда. Бир ўзгачалиги, ушбу хўжалик техникасидан Туркистондаги бошқа қишлоқлар деҳқонлари ҳам самарали фойдаланиб, миннатдорчилик билдиришмоқда. 

Бир киши ариқ қазийди, юз киши сув ичади, деган нақл шу бўлса керак. Вилоят марказидан келган делегация аъзолари Фарҳод Абдуллаевга, унинг ўғли, техника ишлари бўйича ўринбосари Давронга, масъулиятни теран ҳис қилаётган механизатор-мутахассисларга миннатдорчиликларини изҳор этиб, ишларида ривож тиладилар. Даврон Фарҳод ўғлига «Өнегелі азамат» кўкрак нишони тақдим этилди. Мукофот муборак бўлсин!