Туркистоннинг Бирлик даҳасидаги бошланғич ўзбек этномаданият бирлашмаси раиси, тиниб-тинчимас Тойир Абдувалиев ҳар гал шу заминни обод этишга беқиёс ҳисса қўшган холис тадбиркор Қутлуғ Ваҳобов ҳақида гапириб беришдан чарчамайди.

Катта қурилишни бошлашдан олдин жуда кўп миқдорда йиғилиб қолган сунъий ахлатни алп техника билан ташиб чиқаришдан эринмаган, шу иши билан эл орасида беқиёс обрў қозонган Қутлуғ Ваҳобовни «Қадами қутлуғ тадбиркор» дейишади. 

Вилоят марказидан ташриф буюрган нуфузли делегация аъзолари Қутлуғ Ваҳобов ахлатхона ўрнида бунёд этган замонавий саломатлик мажмуаси, ободончилик ишларини зўр қизиқиш ҳамда мамнуният билан томоша қилдилар. Саволлар ҳам шунга яраша, кўп бўлди. Лекин кам гапириб, кўп ишлашни одат қилган Қутлуғ Ваҳобов ўрнига асосан Тойир ака жавоб бериб турди. Мана шунинг ўзи ҳам катта фазилат. Машҳур қўшиқда куйланганидек... “менинг кимлигимни эл билса бўлди”... Қутлуғ Ваҳобовга ўзи таҳсил олган А. Навоий номли мактабда ўтган шоирнинг 575 йиллигига бағишланган тадбирга ҳомийлик қилгани учун шаҳар ҳокимлиги, маданият бўлими томонидан фахрий ёрлиқлар тақдим этилган эди. Вилоят делегацияси аъзолари иштирокида газетамизнинг доимий обуначиси, ҳимматли тадбиркор Қутлуғ Ваҳобовга «Өнегелі азамат» кўкрак нишонини Туркистон шаҳрининг фахрий фуқароси Дониш Маннотов зўр тантана билан тақдим этди. (тасвирда) Мукофот қутлуғ бўлсин, Қутлуғ ака.