Гўзал табиатининг ўзи дардларга малҳам бўлган Тулкибош тумани, Кумисбастау овулида янги технология билан таъминланган “AQUA SEREBRO” табиий булоқ суви заводи ишга тушди.

Заводнинг смета қиймати 250 млн. тенгени ташкил этди. Бу ерда 26 киши иш билан таъминланган. Соатига 1000 дона 5 литрли ҳамда 5000 дона 1 литрли идишда сув чиқариш имкониятига эга корхонани “А-СПЕКТР” МЧБ ишга туширди.

Янги цехлардаги барча техник жараёнлар сифат меъёрига мувофиқ бажарилади. Ишлаб чиқариш цехида кимёвий, бактериологик лабораторияларнинг жойлашиши маҳсулот сифатини ҳар томонлама текширишга жуда қулай.

Корхонанинг очилиш маросимида сўзга чиққан туман ҳокими Нурбўл Тўрашбеков ва овул фуқароси М. Ибрагимов қишлоқда барпо этилган цех ишига муваффақиятлар тиладилар. Заводнинг рамзий тасмаси қирқилгач, меҳмонлар цехлардаги ишлар билан яқиндан танишишди. 

Мухтасар қилиб айтганда, ушбу корхонани Элбошининг “Келажакка йўлланма: маънавий янгиланиш” мақоласида таклиф этилган “Туғилган ер” дастурига мувофиқ овулларни ривожлантириш мақсадида нафақадор Ж. Султанов ишга тушириб, қишлоқ аҳолиси бандлигини таъминламоқда. Тадбиркор келажакда маҳсулотни кўпайтириб, истеъмол бозорини кенгайтиришни режалаштирмоқда. Таъкидлаб ўтиш жоизки, туман ҳокимлиги келгусида табиатга зарар келтирмайдиган ишлаб чиқариш ўринларини барпо этиб, минтақа аҳолисини экологик тоза маҳсулотлар билан таъминлашни режалаштирмоқда.