Жанубий Қозоғистон вилояти маданият бошқармаси, вилоят маданият ва халқ ижодиёти марказлари биргаликда ташкил этган “Мангу эл” ватанпарварлик куй-қўшиқлари танлови ўз ғолибларини аниқлади. 

Тадбир вилоят маданият бошқармасининг раиси Нурбўлат Ахметжановнинг қутлови билан очилди. Мазкур танловда вилоятимизнинг барча туман ва шаҳарларининг саралаш босқичларидан ўтган 52 бастакор ва 52 хонанда иштирок этиб, икки босқичда ўз маҳоратларини кўрсатдилар.

Қозоғистон Республикаси Маданият арбоби, Қозоқ миллий санъат университети профессори, бастакор, Қозоғистон бастакорлар уюшмаси Астана шаҳар бўлимининг раҳбари Серикжан Абдинуров, созанда-бастакор, Қозоғистон Ёшлар иттифоқи мукофотининг лауреати, ҚРда хизмат кўрсатган артист Марат Ўмаров, халқаро танловлар лауреати Бауржан Исаев, айтишувчи оқин – Б. Ўтеп номли санъат мактабининг директори Маржан Есжанова, ҚР Маданият арбоби, "Қазақстан РТРК" ЖҚВ филиалининг шеф-муҳаррири Атабек Мухтарлар мусобақага ҳакамлик қилдилар.

Ғолиблар эълон қилинди. Бош соврин – 300 минг тенгелик мукофотни шимкентлик Избасар Кенесов ютиб олган бўлса, “Оңтүстік Цирк”нинг джаз эстрада қўшиқчиси Берик Сексенбайули биринчи ўрин ҳамда 200 минг тенге мукофотни қўлга киритди. Иккинчи ўрин ва 150 минг тенге туркистонлик таниқли бастакор Алимбай Бўтақараевга, учинчи ўрин ва 100 минг тенге бастакор Қуралай Сатмухамбетовага насиб этди.

Хонандалар орасидан биринчи ўринга туркистонлик Бижигит Исмағулов ҳамда шимкентлик Гулхая Жуашбаевалар, иккинчи ўринга  ҳамюртларимиз Бағдат Сейитбеков ва Асқар Жайлаубаев, учинчи ўринга шимкентлик Бейбарс Серикбаев ва Санат Алимхановлар сазовор бўлдилар.