Мустақил Қозоғистоннинг чегарасини чорак асрдан буён бенуқсон қўриқлаб келаётган Қозоғистон Республикаси Миллий хавфсизлик қўмитаси Чегара хизмати қийин даврларни бошдан ўтказгани маълум. Чегарачилар кунини муносиб нишонлаш учун мамлакатимиз бўйлаб турли тадбирлар уюштирилмоқда.

19 май куни Чегара хизматининг ташкил этилганига 25 йил тўлиши муносабати билан Алмати шаҳридаги Панфиловчилар истироҳат боғида эстафетага старт берилди. Унинг машъаласи уч ойда Қозоғистон Республикаси чегарасини – 15000 километрни босиб ўтиб, байрам куни Астанага етказилади. 

7 август куни Шимкент шаҳридаги “Даңқ” ёдгорлигида эстафета байроғи Жетисай чегара гуруҳи 2024, 2024 А ҳарбий бўлимларининг чегарачиларига топширилди.

“Оңтүстік” минтақавий бошқармасида эстафета 29 июлдан бошланган бўлиб, 16 августгача давом этди. Шу вақт ичида у Қизилўрда, Жанубий Қозоғистон ва Жамбил вилоятлари аҳоли манзиллари орқали, ана шу ҳудуддаги чегара заставалари, назорат-ўтказиш пунктлари орқали олиб ўтилди.

“Оңтүстік” минтақавий бошқармаси раҳбари А. Тўлегенов эстафетанинг мақсади ҳақида гапираркан, жумладан шундай деди:

– Давлат чегарасини ҳимоя қилиш ва кузатишда чегарачиларнинг фаолияти, ёшлар онггида ватанпарварлик туйғусини жўш урдириш, катта авлод вакилларига иззат-ҳурматни ошириш.

Сўнгги йилларда давлат қўллови билан чегарачиларнинг мартабаси сезиларли даражада ошди.