Жаҳондаги энг қадимий ва шарафли касблар новвойлик, тикувчилик ва қурувчилик саналади. Одамнинг қорни тўқ, усти бут бўлгач, бошпана излайди. Туркистонлик қурувчилар янги йилнинг дастлабки ойидан бошлаб Ўтрор кичик туманида кўп қаватли уйлар қуриб, шаҳардаги марказий кўчалар, жумладан, Тўлебий кўчасида йўл ва пиёдалар йўлагини таъмирлаш каби ишларни жадал давом эттирмоқдалар.

Қурувчиларнинг касбий байрамига бағишланган тадбирни шаҳар ҳокимининг ўринбосари Мақсат Асилбекули олиб борди. Унда туркистонлик қурувчилар шаънига кўп яхши ниятлар билдирилиб, шаҳар қурилиш бўлими бош мутахассиси С. Сейилбеков вилоят ҳокимининг фахрий ёрлиғи ҳамда қимматбаҳо мукофот билан тақдирланди. Шунингдек, тадбирда қурилиш соҳасининг фахрийлари Жонтемир Алимов, Аскер Абдиқадиров, Шайиқбек Қудайбергеновлар ўзларининг эзгу ниятларини изҳор қилиб, издош шогирдларига омад ва зафарлар тилашди. 

Суратларда: шаҳар ҳокимининг ўринбосари М. Танатаров ва фахрий қурувчилар байрам билан муборакбод этмоқда; тадбир иштирокчиларидан бир гуруҳи шаҳар ҳокимлиги биноси олдида.