Икки томонлама ҳамкорликни янада кучайтириш мақсадида европаликлар минтақамизнинг соғликни сақлаш ва сайёҳ­лик соҳасига сармоя кири­тишга тайёр. 

Бу ҳақда Словакия Респуб­ликасининг Қозоғис­тондаги Фавқулодда ва мухтор элчиси Петер Юза бошчилигидаги делегация ва Жанубий Қозо­ғистон вилояти ҳокими Жансейит Туймебаевнинг учрашувида гап юритилди.

Делегация таркибида Слова­киянинг Жанубий Қозоғистон вилоятидаги фахрий консули лавозимига номзод Георгий Докучаев, “Investconcult” компанияси директори Сматана Мирослав ва компания вакили Алмаз Абилмажинов бор.

Учрашувда томонлар Сло­вакия ва Жанубий Қозоғистон вилояти орасидаги алоқа ва муносабатларни янада ривожлантириш юзасидан фикр алмашди. Меҳмонлар вилоятимизнинг соғликни сақлаш ва сайёҳлик соҳаларига сармоя қуйишларини маълум қилишди. Шунингдек, Шимкентда фахрий консулхона очиш масаласи муҳокама қилинди.

Минтақа раҳбари Жансейит Қансейитули меҳмонларнинг ишига муваффақият тилаб, барча масалада ёрдам беришга тайёр эканлигини билдирди, январда вилоятимизда Венгриянинг фахрий консулхонаси очилганини таъкидлади.

– Вилоятимиз – сармоявий иқлими қулай минтақалардан бири. Бизнесни қўллаб, ривож­лантиришнинг янги механизмлари шаклланмоқда. Иқтисодиётнинг асосий соҳаларидаги бизнес-лойиҳалар давлат томонидан қўллаб-қувватланмоқда, – деди вилоят раҳбари.

Таъкидлаш жоизки, Словакия бугунги кунда етакчи индустриявий-аграр мамлакат ҳисобланади. Сайёҳлик ҳам ривожланган. Мамла­катнинг сўлим табиати, тоғлари, тоғ-чанғи базалари ва қадимий қалъалари туристларни жалб қилиб келмоқда. Автомо­билсозлик ҳам яхши ривожланган. 

Учрашув сўнггида томонлар юқорида таъкидланган соҳаларда тажриба алмашиб, ҳамкорликдаги лойиҳаларни жорий этиш ниятида эканликларини маълум қилишди.