Шимкентда чиқарилаётган оёқ кийимларга бугунги кунда талаб кучайиб, импортни алмаштириб келмоқда. “Қозоғистонда ишлаб чиқарилган” деган тамға билан мамлакат бозорида сотилаётган пойафзаллар чарм ва лакланган теридан ишланади. “Заря” савдо белгиси билан маҳсулот чиқараётган цех эркаклар, аёллар ва болаларга мўлжалланган қишки, ёзги ва спортчилар учун 27 хил оёқ кийим чиқаради. 

Бу ерда замонавий 180 русумдаги маҳсулотлар тикилади.

Улар хорижникидан қолишмаслигини айтган тадбиркор оёқ кийимни бир марта сотиб олган киши доимий мижозга айланишини ифтихор билан маълум қилди. Сабаби, сифати юқори, ёқимсиз ҳид чиқармайди.

Мамлакат маҳсулотини ишлаб чиқараётган тадбиркор хомашёнинг катта қисмини Шимкентдаги қоракўл заводидан, шунингдек, Алмати ва Семей шаҳарларидан олаётган экан.

Цех раҳбари айни пайтда Россия тадбиркорлари билан музокаралар олиб бормоқда. Битимга эришилса, улар ой сайин 1000 жуфт пойафзал сотиб олмоқчи.

Цех маҳсулотига Астана ва Ақтўбе шаҳарлари тадбиркорлари ҳам қизиқиш билдиришмоқда. Улар ўз шаҳарларида “Заря” оёқ кийим дўконларини очишмоқчи. 

Айни пайтда кунига 30-40 жуфт пой­афзал чиқараётган цех маҳсулотларини ЖҚВ, Жамбил, Қизилўрда вилоятлари ҳамда Алмати шаҳри бозорларига жўнатмоқда.

Ҳа, айтганча, маҳсулотнинг баҳоси ҳам ҳамёнбоп. Масалан, эркаклар пой­афзали 5-10000 тенге оралиғида бўлса, аёллар оёқ кийими 5-15000 тенге атрофида. Болалар пойафзалини эса 4000-8000 тенгедан харид қилишингиз мумкин.