Жанубий Қозоғистон вилоятидан 36 оила Шимолга отланди. Улардан ҳозирча икки оила Ақтўғай туманига бориб жойлашса, қолганлари у ердаги шарт-шароит билан танишиб, имкониятларни кўриб қайтиш ниятида. 

Сариоғоч тумани Абай овулининг фуқароси Сейдали Аширбаев бундан бир ой аввал ушбу туманга бориб, бу ердаги вазиятни ўз кўзи билан кўриб қайтганди. Унинг айтишича, туман қишлоқ хўжалигини ривожланитирмоқчи. Ҳозирда у қулай об-ҳаво ва унумли ер ҳамда техникадан фойдаланиб экин экишни мўлжалламоқда. 

Шимолга кўчаётган фуқароларни вилоят иш билан таъминлашни мувофиқлаштириш ҳамда ижтимоий дастурлар бошқармасининг раҳбари Мухит Ўтаршиев етакчилигидаги гуруҳ кузатиб қўйди. Бошқарма раҳбарининг айтишича, бу йил 113 оила шимолга кўчган. Вилоят фуқаролари, яъни мамлакатимизнинг иш жойлари кўп ҳудудларига кўчиб борган оилалар  Шимолнинг Айиртау, Ақжар, Жумабаев, Есил ҳамда Уалиханов туманларига бориб жойлашади.

Танланган Павлодар, Қўстанай, Шимолий ҳамда Ғарбий Қозоғистон вилоятларига кўчиб борганларнинг ичида жанубликлар кўп, дейишди бошқарма мутахассислари. Уларнинг аксарияти қишлоқ хўжалиги соҳасини ривожлантирмоқда.

Айтганча, вилоятдан Шимолий минтақага кўчишга ният билдирганлар сони кўпайиб келмоқда. Соҳага жавобгарлар кўчиб борган фуқароларни аввало бошпана билан таъминлаб, ишга жойлаштиради. Бу йил кўчиб борган оиланинг ҳар бир аъзосига ойлик ҳисоб кўрсаткичи миқдорида, тахминан 80 минг тенге бир марталик ёрдам берилади. 

Шунингдек, бир йилгача яшайдиган уйининг ижара ҳақи ва коммунал тўловлари тўлаб берилади.