Сайрам туман маслаҳати депутати, Қорамурт қишлоғидаги Ю. Гагарин номли мактабнинг директори, фаол жамоатчи Анорой Жамолова билан суҳбат.
– Вилоятимиздаги миллатдошларимиз зич истиқомат қиладиган аҳоли манзилларида бир нечтадан ўқув марказлари самарали фаолият юритиб келмоқда. Уларнинг муваффақияти эса битирувчиларнинг грант эгаллашлари билан баҳоланади. Кейинги пайтда яхши натижалар кузатилмоқда. Жумладан, нафақат, битирувчиларга, балки, ёш йигит-қизларга чет тилларини ўрганиш, бошқа фанларни чуқур эгаллашда ёрдам берилмоқда. Қорамурт қишлоғида ана шундай ўқув марказининг йўқлиги Сизни кўпдан буён безовта қилиб келарди.
– Тўғри айтасиз, Қорамуртда ана шундай марказ йўқ эди. Ота-оналар, илмга чанқоқ ёшларнинг илтимосига кўра, уни ташкил қилдик. Шимкент шаҳридан, бошқа ҳудудлардан малакали, тажрибали устозларни жалб этдик. Рус тили, инглиз тили, математика фанларидан чуқурлаштирилган дарслар берилмоқда, шунингдек, бошланғич синф ўқувчилари билан репетиторлар шуғулланмоқда. Бу – қишлоқ округи ёшларининг илмли, зукко бўлишларига хизмат қиладиган зиё маскани, десак адашмаймиз.
– Марказ сиз ўйлагандек натижа берармикан?
– Албатта. Марказ фаолиятига бир йил тўлмасданоқ кутганимиздан зиёда “мева” бера бошлади. Жорий йил ягона миллий тестга 13 нафар ўқувчини тайёрлаган бўлса, улардан олти нафари тестда юқори балл тўплаб, грант соҳибига айланди.
Марказни ташкил қилишдан асосий мақсадимиз – ёшларга чет тилларини чуқур ўргатиш эди. Элбоши Н. Назарбаевнинг таълим соҳасини ислоҳ қилишга алоҳида эътибор қаратаётгани маълум. Президент белгилаган муҳим вазифаларни амалга ошириш мақсадида ана шу ишга қўл урган эдик. Фарзанди чет тилини мукаммал эгаллаб, дунёвий алоқа тилида бурро-бурро гапириб турса, ота-онанинг боши осмонга етиши тайин.
– Қишлоқда ободонлаштириш ишлари қандай кетмоқда?
– Худо хоҳласа, 21та кўчамизни навбати билан асфальтлаш ишлари бошланмоқда. 2-3та кўчага ёритиш мосламалари ўрнатилди. Мактабга борадиган асосий кўчага йўлакча ишланди. “Янги йўл” мавзесига ҳам пиёдалар йўлакчаси қуриш учун маблағ ажратилди. Мактабга борадиган кўчаларга йўл белгилари ва тезликни оширишга имкон бермайдиган мосламалар ўрнатилди.
– Депутат сифатида ҳомийлик ишларида ҳам иштирок этяпсизми?
– “Мактабга йўл” акциясида, ногиронларга кўмак кўрсатишни кўзлайдиган тадбирларда баҳоли қудрат қатнашаман. Астана шаҳрида ўтаётган ЭКСПО – 2017 халқаро кўргазмасини томоша қилишлари учун кам таъминланган оилаларга чипталар харид қилдик. Ҳамқишлоқларимиз ҳам халқаро кўргазмани ўз кўзлари билан кўриб, ундан баҳраманд бўлган ҳолда янгиликларни қишлоғимиз ҳаётига татбиқ этишларини истайман. Яна шуни айтишим мумкинки, яқинда қишлоғимиздаги иккита уйда ёнғин чиқди. Зарар кўрганларга қўлдан келганча ёрдам бердик.
– Оила – муқаддас. Қишлоқдаги оилаларни сақлаб қолишда жонбозлик кўрсатмоқдасиз. Бу – қанча болаларни ота-она меҳридан мосуво бўлиб қолишдан сақлайди...
– Бир оиланинг парчаланиши қанча-қанча одамнинг тақдирига таъсир этишини яхши биламиз. Шундай экан, яхши ниятда қурилган оила арзимаган гап-сўзлар таъсирида бузилмаслиги керак. Тарбияли, маданиятли оилада камол топган фарзанднинг жамиятга ҳам фойдаси тегиши сўзсиз. Шу сабабли, “Нур Отан” партияси қошида ташкил этилган кенгаш оилаларни мустаҳкамлаш йўлида иш юритмоқда.
– Сайлов округингизда яна қандай муаммолар бор?
– Қишлоқда ёшларни бошпана билан таъминлаш масаласи долзарблигича қолмоқда. Қорамурт қишлоғида ипотека асосида бериладиган 200та уй қуриш ва уларни ёш оилаларга бериш депутатлик режамга киритилган. Шунингдек, у ерда мактаб ва болалар боғчаси ҳам бунёд этилади. Мана шу режаларим амалга ошса, ўзимни бахтиёр ҳис этардим.
– Аёл кишига мактабдаги раҳбарлик, депутатлик ва жамоат ишларида қатнашиш қийин эмасми? Ўзингиз биласиз, ўзбек оиласида аёл, она, турмуш ўртоғининг роли қай даражада эканлигини.
– Қайнотам олий маълумотли, зиёли одам эди. Турмуш ўртоғим ҳам ҳар жабҳада мени қўллаб-қувватлайди. Бажараётган ишимни ўз вазифам, бурчим деб билганим, ишимга масъулият билан ёндашганим сабабли, қийинчиликларни сезавермайман. Раҳбарлик ва депутатлик ишимни тўлақонли бажаришим учун оиламда шароит яратилган. Оиламдагилар ишимни тўғри тушунганликлари учун бу борада муаммо йўқ. Уйда директор ёки депутатлигимни унутиб, ўз вазифаларимни тўкис адо этишга ҳаракат қиламан. Уларга улгуришимга вақтимни тўғри тақсимлашим сабаб бўлса, ажабмас.
– Ҳозир мутолаа масаласи кўп муҳокама этилмоқда. Бунда ёшларни айбдор қилаётганлар ҳам оз эмас. Лекин, ўзлари китоб, газета ўқимайдиган, демак, фарзандларига китоб совға қилишни хаёлига келтирмайдиган ота-оналар ҳам борлигини эсдан чиқармаслик керак.
– Тўғри, ҳозирги даврда китоб мутолаа қиладиганлар сафи сийраклашиб кетди. Ёшлар маълумотни Интернет тармоғидан тезлик билан олишни жўн кўради. Ахборот асри бўлганлиги учун унга қарши чора кўриш қийин. Лекин, биз, катталар китоб мутолаасига ёшларни қизиқтиришимиз, уларни рағбатлантиришимиз лозим. Мактабимизда шунга оид танловлар уюштирмоқдамиз. Ўқитувчилар орасида ҳам ана шундай баҳсларнинг ўтказилиши самара беришига ишонаман.
– Бўш вақтингизни қандай ўтказасиз?
– Бўш вақтим жуда кам бўлади. Топилиб қолса, табиат қучоғида маданий ҳордиқ чиқаришни хуш кўраман. Шунингдек, телевидениеда янгиликлар дастурини ўтказиб юбормасликка ҳаракат қиламан. Газета ўқишни ҳам канда қилмайман. Заковат ўйинларини томоша қилиш – жони дилим.
Бундай кўрсатувларни кўриш дилимни яйратади. Улар менга маънавий озиқ бериш билан бирга кўп маълумотлардан воқиф қилади.
– Оилангиз ҳақида ҳам маълумот берсангиз?
– Уч нафар фарзандим бор. Барчаси оилали, ўзлари истаган ихтисос бўйича таълим олишган. Беш нафар набирамиз оиламизнинг қувончи.
– Анорой опа, мазмунли суҳбатингиз учун раҳмат!