Астана шаҳрининг асосий кўчалари бўйлаб “Туркий элнинг туб томири – Жа­нубдан Астанага салом!” номли санъат карвони юриб ўтди. Элимиз тарихидан сўз очган мусиқий карвон “Ғашықтар” майдонидан “Бәйтерек” майдонига юриб келди.

Карвон сафида Олтин одам, Арслонбоб, Хожа Аҳмад Яссавий, Ал-Форобий каби тарихий шахслар ва олимлар, хонлар, ботирлар, бийлар кўринишидаги санъат арбоблари, ЭКСПО гўзали ва миллий либосдаги хонандаю раққосалар, цирк уста­лари ҳамда дошқозон, арава каби миллий қадриятларимизни намойиш этадиган анжомлар бор. Минтақанинг тарихий кўри­нишини акс эттирган санъат тадбирида 500дан зиёд санъат­кор қатнашиб, маҳаллий бас­такорлар Ш. Қалдаяқов, С. Байтерековнинг қўшиқлари ижро этилди.

Тадбир дастлаб “Қазына”,  “Шаттық”, “Шамсинур” рақс дасталари ижросидаги  “Мереке думан” рақси билан бошланиб, “Бәйтерек” майдонида 600 ёш дўмбирачининг бир вақтда Қ. Сиғирбайулининг “Балбирауин” куйи ижроси билан якун­ланди.

Жанубий Қозоғистон вило­ятининг Астанадаги бир куни “Бәйтерек” майдонида вилоят санъат усталарининг “Салом, Астана! Салом, ЭКСПО-2017!” байрам концерти билан якун­ланди.

Концертда ҚР Маданият ар­боби Айжан Таженова “Дўмбира ҳақида баллада”ни ижро этса, “Оңтустік-Цирк”нинг  “Х-бэнд” эстрада дастаси замонавий куй ва қўшиқлар ижро этди. Шунингдек, Ш. Қалдаяқов но­мидаги вилоят филармонияси хонандалари, “Семсер” гуруҳи, “Өркен” оилавий дастаси, “Асу” триоси ҳам саҳнага чиқди

Томошабинларни куй ва қўшиқ­лари билан хушнуд қил­ган Жануб санъаткорлари эл олқишига сазовор бўлишди.

Тадбир давомида вилоят ҳо­кимининг биринчи ўринбосари Уласбек Садибеков элимизнинг барча вилоят ҳокимлари имзо қўйган ЭКСПО байроғини ЭКС­ПО-2017 халқаро кўргазма комиссари Р. Жўшибаевга тан­танали равишда топширди.