Меҳрибон ва ғамхўр Аллоҳ номи билан бошлайман!

Барчамизни ҳайитга омон-эсон етказган Аллоҳ Таолога беадад шукрлар ва санолар бўлсин!

Барчангизни, меҳр-мурувват, бағрикенглик ифодаси бўлган хосиятли, улуғ байрам – Қурбон ҳайити билан табриклайман! Оилаларингизга тинчлик, омонлик, дастурхонларингизга тўкинлик, мустаҳкам соғлик, ишларингизга барака тилайман. 

Қурбон ҳайити – Яратганнинг бизга белгилаб берган икки байрамнинг буюги. Юртимиз  унга ўзгача тайёргарлик кўриб, ҳамжиҳатликда нишонлайди. Байрам эзгулик, меҳр-оқибат ва кечиримли бўлишга чорлайди.

Ҳайит – ака-ука, қариндош-уруғларни бирлаштирадиган, мусулмон аҳлини имонга чорлайдиган, одамларни қаноат ва тавба қилишга ундайдиган буюк байрам. Ушбу кунда инсонлар фақатгина қурбонлик қилибгина қолмасдан, савоб, эзгу, хайрли амаллари билан Роббимизнинг розилигига, раҳм-шафқатига эришадилар. Чунки, араб тилидаги “Қурбон” сўзи “яқин бўлиш”, “ёндашиш” деган тушунчани билдиради.

Ҳурматли диндошлар! Барчангизни шу муносабат билан, аҳли мусулмонларнинг ҳурмати учун ногирон, етим-есирларга, қаровсиз қолган қарияларга меҳр-мурувват кўрсатишга чақираман.

Аллоҳ Таоло дуоларимизни, эзгу тилакларимиз ва савобли ишларимизни, қилаётган қурбонликларимизни қабул қилсин! Омин!