Шимкент шаҳрининг Сайрам даҳасидаги 12-сонли спорт мактабида стол тенниси билан шуғулланаётган ёшлар орасидан кўплаб ажойиб спортчилар етишиб чиқмоқда. 

Улар турли даражадаги мусобақаларда вилоятимиз, республикамиз спорт шарафини муваффақиятли ҳимоя қилиб келишмоқда. Бунда мактабнинг стол теннисидан олий тоифали устоз-мураббийи, Халқаро даражадаги ҳакам Мирёқуб Мираслоновнинг хизматлари тақсинга лойиқ. Уларнинг шогирдлари Алмати шаҳридаги иқдидорли болалар учун очилган спорт интернатида таълим олиб,  маҳоратини ошириб, нуфузли мусобақаларда иштирок этишмоқда. Улардан бири, ёшгина қизалоқ, Шимкент шаҳридаги Е. Юсупов номли мактаб ўқувчиси, стол теннисидан спорт усталигига номзод, 12 ёшли Сарвиноз Мирқодирова. У ёзги таътил кунлари қозоғистонлик бир тўп теннисчи спортчилар сафида Хитойнинг Тайбей, Шанхай шаҳарларида ва Люксембургда ташкил этилган ўқув-машғулот йиғинларида қатнашиб, дунёга таниқли устоз-мураббийлардан маҳорат дарсларини олди. Янги ўқув йили олдидан у билан суҳбатда бўлиб, фикр-мулоҳазалари билан қизиқдим. Ёш қизчамизнинг асл мақсади – келажакда йирик мусобақаларда Қозоғистонимиз шарафини ҳимоя қилиш, устозлари ва ота-онаси ишончини оқлаш.

Унинг орзулари рўёбга чиқишини тилаб қоламиз.