Ҳар йили 29 август куни Семей ядро полигони ҳудудида бир пайтлар ҳарбий хизматини ўтаган собиқ аскарлар учрашиб, ўтмишни хотирлашади. 

Шу билан бирга, нурланиш туфайли оламдан ўтган сафдошлари хотирасини ёдга олишади. Статистик маълумотларга кўра, жами бир ярим миллион қозоғистонликлар турли даражада нурланиш олган. Мамлакатимиз мустақилликка эришгандан кейингина инсоният ёстиғини қуритган бу ҳудудни батамом йўқ қилишга қарши кураш ниҳоят ўз натижасини кўрсатди. 1991 йилнинг 29 августида Президентимиз томонидан “Семей ядро полигонини ёпиш тўғриси”да қарорига имзо чекилди. Мана шунга ҳам 26 йил бўлибди. Ҳар йили ушбу кун Сайрам туманидаги Маҳаммаджон Ирисметов етакчилик қилаётган “Семей ядро полигони фахрийлари” жамоат бирлашмаси ядро полигонида сидқидилдан хизмат қилган ва натижада ўз соғлигини йўқотган инсонларни бир пиёла чойга таклиф қилиб, ҳурматини жойига қўяди. Маълумки, туман бўйича жами 400 нафар фуқаро бу ҳудудда хизмат қилган бўлса, уларнинг қарийб ярми майиб-мажруҳ. Вилоят соғликни сақлаш департаменти имкон қадар нурланишдан азият чекаётганларга тиббий ёрдам кўрсатмоқда. Уларга яна турли санаторийларга йўлланмалар берилмоқда. Жорий йилнинг 29 августида Оқсувкентдаги “Оқсув” қаҳвахонасида собиқ семейликлар учрашиб, ўзларини ташвишга солаётган муаммоларни ўртага ташлашди, қолаверса, жамоат бирлашмаси раҳбарияти томонидан энг фаол ҳамюртларимизга Фахрий ёрлиқлар топширилди. Худди шундай тадбир Қорабулоқ қишлоқ округида ҳам бўлиб ўтди.

 Суратда: собиқ семейчилар уч бий ҳайкали пойида.