Тўлебий туман ҳокимлигининг навбатдаги кенгайтирилган мажлисида туманнинг агросаноат мажмуасини ривожлантиришга оид давлат дастурини бажаришга қўшаётган ҳиссаси муҳокама қилиниб, галдаги вазифалар белгиланди. 

– Келгусида Шимкент атрофида «Оңтүстік экспорт» озиқ-овқат белбоғи ва вилоят бренди яратилади, – деди туман ҳокими Бухарбай Парманов. – Сайрам, Сариоғоч, Мақтаарал туманлари бир неча йиллардан бери ишлаб чиқараётган маҳсулотларини экспорт қилмоқда, туманимизда ҳам озиқ-овқат саноатини ривожлантириш учун барча имкониятлар бор. Сўздан амалий ишга ўтиш пайти келди. «Оңтүстік экспорт» лойиҳаси талабларига мос келадиган маҳсулот етиштиришни келгуси йилдан бошлаймиз. Бунинг учун барча деҳқон, фермерлар ва импортбоп товар ишлаб чиқарувчиларни қўллаб-қувватлашга тайёрмиз. Улар йирик хўжаликларга бирлашиб, мегаполисга айланаётган Шимкент билан агломерация доирасида меморандум имзолашлари керак. 2000 гектар сабзавотдан ташқари, 10 минг гектарда олма боғи барпо этилиб, 300 гектар ёнғоқзор ва 100 гектар бодомзор туманимизни боғу-бўстонга айлантиради. Давлат субсидия ажратаётган уруғчилик соҳаси ҳам туманимизда йўлга қўйилади ва бунинг учун 1500 гектар ер ажратилади. 300 гектар ерда малина ўстирилади. Натижада, юзлаб янги иш ўринлари очилади.