Вилоят ҳокими Ж. Туймебаев Туркистонга иш сафари чоғида туризмни ривожлантириш, шаҳарга Туркия ва Ўзбекистондан келадиган зиёратчилар сонини кўпайтириш учун зарур шароитларни яратиб бериш вазифасини юклаган эди. 

Жорий йилда Ўзбекистондаги Республика қозоқ маданияти маркази ташаббуси билан Туркистонга икки марта зиёратчилар ташриф буюрди. Д. Маннотов, Р. Камолов, Р. Қўчқоров каби фаоллар саъй-ҳаракати билан зиёратчиларга юксак даражада иззат-икром кўрсатилди. Доимий обуначимиз, пайғамбар ёшига тўлиши муносабати билан 63 нусха «Жанубий Қозоғистон»га ҳомийлик қилиб, барчага намуна бўлган Туркистонлик Тойир Абдувалиев таклифи билан қўшни Ўзбекистоннинг Андижон шаҳридан Нўъмонжон Иброҳимов умр йўлдоши Кибриё опа билан Туркистонга келдилар. 

Т. Абдувалиев ўғли Акром билан бунёд этган «Индира» балиқ таомлари қаҳвахонасида тадбиркорлар Ҳасан Отахонов, Носир Ҳамроқулов, ҳамда Тойир аканинг укаси Эркинжон Абдувалиевлар даврасида таҳририятнинг Туркистон бўлими номидан қадрли меҳмонга «Киелі Түркістан» ҳамда «Қозоқча-ўзбекча луғат» китоблари тақдим этилди. 75 ёшдаги зиёратчи меҳмон Нўъмон ота икки давлат ўртасидаги дўстона алоқалар кундан кунга мустаҳкамланиб боришини тилаб, дуои фотиҳа қилди. Яхши ниятларимизнинг ижобатини берсин! 

Эртаси куни Т. Абдувалиев қадрли меҳмонларни Туркистон, Ўтрор ва Сайрамдаги муқаддас қадамжоларни зиёрат эттириб, ҳурмат-эҳтиром билан кузатиб қўйди. 

Суратда: меҳмонлар ва мезбонлар «Индира» қаҳвахонаси олдида.

Муаллиф тасвири.