Элбошимизнинг «Келажакка йўлланма: маънавий янгиланиш» мақоласи ва  унинг йил бошидаги халққа Мактубида Қозоғистоннинг учинчи замонавийлашуви бошлангани эълон қилинди.

Дарҳақиқат, жаҳондаги энг ривожланган 30 мамлакат қаторига қўшилишдек  эзгу мақсадларга эришишда мустақил дунёқарашга эга бўлган, жисмоний, маънавий ва интеллектуал салоҳияти юксак баркамол авлод  ҳам салмоқли ҳисса қўшади.

Мақолада белгиланган вазифалар  барча мураббий, педагог кадрлардан ўз устида янада кўпроқ меҳнат қилиш, керак бўлса, ўзини ислоҳ этишни ҳам тақозо қилади. Чунки, тезкор ахборот асрида эскича ўқитиш усулининг самараси етарли даражада бўлмаслигини бугун ҳаётнинг ўзи исботламоқда. 

Президентимиз таъкидлаганидай, муваффақиятли бўлишнинг энг асосий, бош омили билим эканини ҳар ким теран тушуниши керак. Ёшларимиз устувор мақсадлари қаторида билим ҳар доим биринчи ўринда туриши шарт. Сабаби, қадриятлар тизимида билимни ҳамма нарсадан устун қўядиган миллатгина ютуққа эришади.