Вилоят маслаҳати депутати Умбет Жусипбаев ташаббуси ва саъй-ҳаракатлари билан Туркистоннинг Бекзат кичик туманига чегарадош Болтакўл йўли бўйидаги ҳудудда “Қишлоқ хўжалиги маҳсулотларини сақлаш ва қайта ишлаш маркази” очилди. 

Ҳар куни 24 соат узлуксиз ишлайдиган ушбу ширкатда мижозлар учун барча қулайликлар яратилган. Чунончи хоридор ўзи танлаган молни бу ерда сотиб олгач, марказ ходимлари уни мижознинг хоҳишига кўра сўйиб, гўштини бўлаклаб, тайёрлаб беришади. 

Бундай хизмат тури, таъкидлаш жоиз, Туркистонда илк марта амалга ошди. Жами 3 гектар майдонда йирик қорамолни автомашинага ортиш ва тушириш майдончалари, меҳмонхона, ошхона, лаборатория, хуллас, ҳаммаси муҳайё. 

У. Жусипбаевнинг таъкидлашича, ушбу ҳудудда 200 гектар майдонда беда экилиб, чорва учун озуқа тайёрланади. Сотиш учун келтирилган моллар ўтмай қолса кейинги бозор кунига қадар шу ерда боқилади. Ушбу ширкатдаги мутасадди шахслардан бири – доимий обуначимиз Аминжон Сафиев қулайликлардан мамнун эканлигини яширмади. 

Ширкат маъмурияти томонидан ёзилган худойи оши дастурхони устида кўплаб қадрли меҳмонлар, шу жумладан, профессор Қулбек Ергўбек, вилоят маслаҳати депутати Зуппархон Чолдонов, шаҳар ўзбек этномаданият бирлашмаси оқсоқоллар кенгаши раиси Тўлқин Саидмуродов ва бошқалар ўз мулоҳазаларини ўртоқлашиб, амалга оширилган бунёдкорлик ишлари учун Умбет Абилдаулига миннатдорчилик билдиришди. 

Суратларда: вилоят маслаҳати депутати Умбет Абилдаули; меҳмонлардан бир гуруҳи.