Каримжон уйида оила аъзолари билан меҳмонларни кутиш учун тайёргарлик кўраётган эди. Янги сотиб олган машинасини "ювмоқчи" эди.
Бир маҳал эшик қўнғироғи жиринглади. Каримжон эшикни очди. Келган – автомашина таъмирловчи уста Жавлон экан. Унинг ташрифи хонадон эгасига ёқмади. Ўтган йили эски машинасини қарзга, 200 долларга таъмирлатган эди. Кейин Хитойга кетяпман, деб, ундан 100 доллар қарз олгани ҳам эсида. Қарзини сўрайвериб, телефон қилавергач, рақамини алмаштиришга мажбур бўлганди. Энди, мана, излаб, уйига келибди. Энсаси қотиб, истамайгина, меҳмонни ичкарига таклиф қилди.
– Янги тулпорлар муборак бўлсин, ака. Илоё, яхши кунларингизда миниб юринг, – қўлини кўксига қўйиб, илиқ тилаклар билдирган йигит бир пиёла чой устида секин муддаога ўтди.
– Каримжон ака, ўзингиз тушунасиз. Менинг ишим юришмай турибди. Пул жуда зарур бўлгани учун қарзингизни узарсиз, деган умид билан келдим.
Мезбоннинг фикри айниди: «қарзимни бермасам, қўлидан нимаям келарди», деган хаёлга борди.
– Нима, мен сендан қарзманми? Улфатларимга мени қарз деб, нега айтдинг? Исботинг борми ўзи? – овозини баландлатди мезбон.
– Ие, бу нима деганингиз? Бир ой олдин келдим, «имконият бўлмаяпти, кейинроқ хабар ол», дегандингиз-ку. Наҳотки айтганингиздан тонсангиз? Лафз борми сизда? – Жавлон бўш келмади.
Шу лаҳзада унинг пешанасидан совуқ тер қуйилди.
– Ака, мен ҳам инсонман, тушунаман. Агар пулдан қийналиб турган бўлсангиз, очиғини айтинг, лоақал бир қисмини бериб турсангиз ҳам рози эдим. Ўша лаънати 300 долларнинг ҳаммасини ҳозироқ берасиз, деб оёғимни тираб олмайман.
– Мен сенга нима дедим? Бир тийин ҳам қарз эмасман сендан, эшитдингми? Бор, қаерга бориб арз қилсанг, қилавер. Ё бирорта гувоҳинг борми? Тилхат ёздириб, расмийлаштириб қўйганмидинг? – Каримжон бақира кетди ва эшикни очиб, меҳмонга чиқиб кетишни буюрди.
– Ҳали шунақами? Машинангизни таъмирлаб берганим учун хизмат ҳақини тан олмаганингиз етмаганидек, Хитойга кетяпман, қарз бериб тур, деб олган 100 долларни қайтаришдан ҳам бўйин товлаяпсизми? Ҳар гал олдингизга келганимда «ҳозир пул йўқ, кейин хабар ол», деб қўйнимни пуч ёнғоққа тўлдириб кузатардингиз. Энди бу гапингизни қандай тушунсам бўлади? Қани лафз? Янги машинага етган пулингиз менинг арзимас қарзимни қайтаришга етмадими?
Шу орада уларнинг тортишувга уй бекаси аралашди:
– Биз ҳеч кимдан қарз эмасмиз. Кеча худойи қилдик, қарз одам аввал қарзини узиб, кейин худойи қилади. Сен эримни қўрқитиб, пул талаб қиляпсан! Бунинг учун қаматиб юборамиз сен болани...
Бу гапларини эшитиб, Жавлоннинг қони қайнаб кетди. У:
– Ҳозироқ пулимни бермасангиз, ҳеч кимни аямайман, – деб, Каримжоннинг ёқасидан олиб, силтай кетди.
Бу орада уй бекаси бор овози билан қичқириб, меҳмон йигит томонга ташланди. Қий-чувни эшитган қўшнилардан бири полицияга қўнғироқ қилди. Орадан кўп вақт ўтмай, чақирилган манзилга етиб келган полиция ходимлари уй олдида кийимлари қонга бўялган йигитни учратишди. «Нима бўлди?» деган саволга йигит жавоб бермай, қоча бошлаган эди, уни тутиб келтиришди.
Каримжон ва унинг хотини кўп қон йўқотган экан, касалхонага етмай жон таслим қилишди.
Олиб борилган тергов жараёни ва дастлабки берилган саволга ушбу мудҳиш воқеани содир этган қотил қуйидагича жавоб берди:
– Нечта одамни пичоқлаганимни билмайман. Туҳматга чидай олмадим. Қаттиқ жаҳл устида жиноят содир этдим. Балки, одамга ўхшаб муомала қилишганларида, бу фожиа юз бермаган бўлармиди...
300 доллар учун бутун бошли бир оиланинг пароканда бўлиб кетганлигига ақл бовар қилмайди. Жавлоннинг ҳам жўжабирдай оиласи узоқ йиллар боқувчисиз қолди.
Марҳумлар ҳақида одатда ноўрин гапириб бўлмайди. Лекин аччиқ бўлсада, айтиш жоизки, марҳум Каримжон ўша қарзларидан тонмаганида ё ўз вақтида узганида, бундай аянчли воқеа содир бўлмасди.
“Пул жигардан бино бўлган”, «Қарз – бўйиндаги сиртмоқ», деб бежиз айтмаган халқимиз.