Туркистон вилояти Марказий Осиёнинг гулчилик марказларидан бирига айланиши эҳтимол. Вилоят ҳокими Нуралхан Кўшеров Хитой Халқ Республикасига хизмат сафари доирасида гулчилик соҳасидаги етакчи ҳудуд ҳисобланган Юньнань провинциясида Куньмин гул саноати савдо-саноат палатаси раиси Лю Цзюньфэн билан учрашди.

Учрашув давомида томонлар гулчилик соҳасини ривожлантириш, сармоялар жалб қилиш, логистика инфратузилмасини такомиллаштириш ва экспорт имкониятларини кенгайтириш масалаларини муҳокама қилдилар. Куньмин шаҳри бугунги кунда жаҳон гул саноатининг муҳим марказларидан бири ҳисобланади. Хитойда етиштириладиган гулларнинг қарийб 80 фоизи айнан шу ҳудудда ўстирилади. Шунингдек, бу ерда Осиёдаги энг йирик гул савдоси биржаси жойлашган бўлиб, маҳсулотлар дунёнинг кўплаб мамлакатларига, шунингдек, Қозоғистонга  ҳам экспорт қилинади.

– “Ягона белбоғ – ягона йўл” ташаббуси ҳамда Қозоғистон ва Хитой ўртасидаги стратегик ҳамкорлик янги иқтисодий имкониятларни очиб бермоқда. Икки мамлакат ўртасидаги чегара ва транспорт-логистика имкониятлари гул маҳсулотларини етказиб бериш муддатини қисқартиришга ҳам ёрдам беради. Туркистонда гул кўчатларини етиштириш, замонавий иссиқхона мажмуаларини ривожлантириш ва қайта ишланган маҳсулотларни нафақат Қозоғистон бозорига, балки Марказий Осиё ҳамда Евроосиё иқтисодий иттифоқи мамлакатларига экспорт қилиш учун барча имкониятлар мавжуд. Сармоядорлар учун зарур шарт-шароитлар яратилади. Аниқ лойиҳаларни биргаликда амалга оширишга ва гулчилик соҳасини янги босқичга олиб чиқишга чақирамиз, – деди вилоят ҳокими Нуралхан Кўшеров.

Шу муносабат билан вилоят ҳокими Куньмин гул саноати савдо-саноат палатаси ва унинг аъзолари Туркистон вилоятида гул етиштириш ва логистика марказини ташкил этиш юзасидан қўшма лойиҳаларни биргаликда амалга оширишни таклиф қилди.

Сафар давомида Туркистон вилояти делегацияси Куньмин шаҳрида жойлашган дунёдаги энг йирик Доунань гул кимошди марказига ташриф буюрди. Ушбу замонавий мажмуада гул етиштириш, саралаш, сотиш ва халқаро бозорларга етказиб бериш жараёнлари бир жойда ташкил этилган.

Марказда ҳар куни миллионлаб гуллар савдога чиқарилади. Атиргул, лола ва бошқа кўплаб гул турлари маҳаллий ҳамда халқаро харидорлар учун махсус бўлимларда сотувга қўйилган. Ҳар йили марказга тахминан 15 миллион сайёҳ ташриф буюради.  Гулларнинг сифати ва чиройини таъминлаш учун замонавий технологиялар қўлланилади.

Учрашув натижаларига кўра, Туркистон вилояти вакиллари номидан Сариоғоч туманида жойлашган “AGRO TUR” деҳқон хўжалиги раҳбари Турсин Тасқўжаев билан ўзаро ҳамкорлик тўғрисида меморандум имзоланди.

Туркистон вилояти ва Хитойнинг гул саноатидаги етакчи ташкилотлар ўртасидаги ҳамкорлик ҳудуднинг агросаноат салоҳиятини янги босқичга кўтариш имконини беради. Гул етиштириш ва логистика соҳасидаги қўшма лойиҳалар Туркистонни Марказий Осиёдаги йирик гул савдоси ва экспорт марказига айлантириш имконини беради. Бу ташаббус янги иш ўринларини яратиш, сармоялар жалб қилиш, экспорт ҳажмини ошириш ва ҳудуд иқтисодиётининг барқарор тараққиётига хизмат қилади. Шунингдек, халқаро тажриба ва замонавий технологияларни жорий этиш орқали Туркистон гулчилик соҳасида рақобатбардош ҳудуд сифатида шаклланиб, Қозоғистоннинг гул саноатидаги етакчилик мавқеини янада мустаҳкамлайди.