Шимкент шаҳрининг Сайрам даҳасидаги “Ихлос” тамаддихонасида таниқли шоира, нафақадаги муаллима, "Илҳом булоғи" уюшмаси раҳбари Озода Аҳмедованинг "Шукрона" китоби тақдимоти ўтди. 

Бизнинг маълумот: Озода Ҳасанбой қизи 1957 йили 20 январда Сайрам қишлоғида дунёга келган. У Ю. Сарёмий номли мактабда, сўнгра Тошкент Давлат университетида таҳсил олган.

Мактабда, сўнгра университетда ижод билан шуғулланган. “Сайрам садоси”, “Жамият ва маърифат”, “Адабиёт ва санъат”, “Маҳалла” ва “Жанубий Қозоғистон” каби маҳаллий газеталарда, “Камалак” ва “Бойчечак” журналларида мақола, очерк, ҳикоя, шеър, тўртлик, рубоий, эссе ва этюдлари билан иштирок этган. Турли жанрдаги ижод намуналари “Турон чечаклари”, “Қанот қоқди”, “Тўёна”, “Исфижоб илҳомлари“, “Нозик диллар туҳфаси”, “Чашма инжулари” каби жамоавий тўпламларда эълон қилинган. 

У “Сайрам”, “Чашма”, “Исфижоб” ижодий уюшмалари ва “Ижодкор” адабий бирлашмасининг аъзоси, 2023 йилдан “Илҳом булоғи” ижодий уюшмасига раҳбарлик қилмоқда.

Тадбир таниқли санъаткор Толибжон Ниёзҳожиев ижросидаги дилтортар тарона ҳамда шоиранинг ижодий фаолияти ҳақидаги видеолавҳа намойиши билан бошланди. Шундан сўнг Қозоғистон Ёзувчилар уюшмаси аъзолари Абдураҳим Пратов, “Ижодкор” адабий бирлашмаси раиси Зокиржон Мўминжонов ва таниқли сухандон Абубакир Хонхўжаевлар ижодкорни илк китоби билан қутлаб, келгуси фаолиятига муваффақият тиладилар. 

Ижодкорни, шунингдек, Халқаро Амир Темур жамғармасининг Қозоғистон филиали раиси Икром Ҳошимжонов, меҳнат фахрийси Эркин Абдунақибов, таниқли болалар шоири, отахон ижодкор Эрназар Рўзиматов, Шимкент шаҳар ЎЭМБ раиси ўринбосари Аббос Шомирзаевлар қутлашди.

Озода Аҳмедова Қозоғистондаги ўзбек адабиётини ривожлантиришдаги самарали фаолияти учун "Ижодкор" адабий бирлашмасининг “Фахрий ёрлиғи”, шунингдек, "Амир Темурнинг 690 йиллиги", "Олтин она", "Үстаз мерейі" кўкрак нишонлари билан тақдирланган. 

Тадбирда ижодкорлар Гулиосиё Ҳасанова ва Саййида шоирага аталган шеърларини ўқиб беришса, хушовоз хонандалар Одилжон Тўғонбоев ҳамда Шавкат Орзиметов унинг шеърлари асосида яратилган қўшиқларни ижро этдилар. Шунингдек, Шоҳида Эшметова ва Юлдузхон Жаҳонгировалар миллий мумтоз қўшиқларни ижро этиб, даврага файз киритдилар. 

Тадбир якунида Озода Аҳмедова ташриф буюрган меҳмонларга миннатдорчилик изҳор этди.