Қозоғистонда коронавирусга қарши вакциналаш бошланди. Вилоят ҳокими ўринбосари Арман Сабитов, жамоат саломатлиги бошқармаси раҳбари Марат Пашимов, бош санитар шифокор Нурбек Нишанов дастлабкилардан бўлиб, Россиянинг Sputnik V вакцинаси билан эмланди. Улар аввал шифокорларнинг кўригидан ўтди. Эмлаш Туркистон шаҳридаги марказий шифохонада амалга оширилди. Бугун вилоятимизда 250 кишини эмлаш кўзда тутилган.

Таъкидлаш жоизки, Давлат раҳбари Қ. Тўқаевнинг топшириғига мувофиқ, Қозоғистонда 1 февралдан бошлаб кўнгилли равишда аҳолини босқичма-босқич эмлаш бошланди. Вилоятимизга Россия Sputnik V вакцинасининг дастлабки партияси – 1300 дона етказилиб, туманларга тарқатилди. 

Вакцинани фақат балоғат ёшига тўлган Қозоғистон фуқаролари олади. 950 минг киши қатнашадиган эмлаш жараёни 2021 йилнинг охиригача давом этади. Биринчи босқичда, юқумли касалликлар шифохонаси, тез тиббий ёрдам хизмати, жонлантириш бўлими, қабул бўлимининг тиббиёт ходимлари эмланади.

Эмлашдан аввал фуқаролар шифокор кўригидан ўтишлари шарт. Бунинг учун тиббиёт ходимлари махсус ўқитилиб, эмлаш хоналари тайёрланди.