Парламент Сенати раиси Маулен Ашимбаев Ўзбекистоннинг Қозоғистон Республикасидаги Фавқулодда ва мухтор элчиси Саидикром Ниёзхўжаев билан учрашди, дея хабар беради Сенат матбуот хизмати.

Учрашувда парламентлараро алоқалар, шунингдек, иқтисодий ва маданий-гуманитар ҳамкорликни янада мустаҳкамлаш масалалари муҳокама қилинди. 

– Ўзбекистон Қозоғистоннинг Марказий Осиёдаги асосий савдо ҳамкоридир. Биз давлатлар раҳбарларининг савдо-иқтисодий ва трансчегаравий ҳамкорлик тўғрисидаги келишувларига юксак аҳамият берамиз. Шу билан бирга, маданий-гуманитар, ижтимоий ва бошқа соҳаларда ўзаро манфаатли ҳамкорлик жадал ривожланмоқда, – деди Маулен Ашимбаев. 

Сенат Спикери Мажлис ва Сенатнинг шу йил 10 январь куни ўтган сайловларни кузатишда Ўзбекистон томонининг фаол иштироки учун С. Ниёзхўжаевга миннатдорлик билдирди ва ушбу тадбир мамлакатни янада ривожлантириш учун муҳимлигини таъкидлади. 

Сенат Спикери Қозоғистон ва Ўзбекистон ўртасидаги барча соҳаларда алоқалар жадал ривожланиб бораётганини таъкидлади. Шунингдек, бутун Марказий Осиё минтақасининг муваффақиятли иқтисодий тараққиёти, барқарорлиги ва хавфсизлиги асосан Қозоғистон ва Ўзбекистон ўртасидаги яқин ва мувофиқлаштирилган ҳамкорликка боғлиқлиги қайд этилди. 

Маулен Ашимбаев, шунингдек, Сенатда бу йил Қозоғистон ва Ўзбекистон ўртасидаги парламентлараро ҳамкорликни мустаҳкамлаш борасида фаол иш олиб борилаётганини таъкидлади.