Сайрам тумани ҳокимлигининг мажлислар залида туман миқёсидаги ер ости бойликларини қазиб олиш саноати ва шағал қазиш соҳасидаги муҳим масалалар муҳокама қилинди.

Туман ҳокими У. Садибеков раислик қилган мажлисда Туркистон вилоятининг сармоя ва экспорт бошқармаси, вилоят экология департаменти ва “Оңтустік ҚазЖерҚойнауы” Жанубий Қозоғистон минтақалараро геология департаменти республика давлат муассасаси вакиллари ва Сайрам туман полиция бошқармаси ходимлари қатнашди.

Бугунги кунда қатор қонуний ва ноқонуний ер ости бойликларидан фойдаланувчиларнинг муттасил қазилма ишлари натижасида атроф-муҳитга келтирилган зарардан ташқари, қишлоқ хўжалиги, тадбиркорлик, саноат ва ижтимоий соҳаларга қарашли стратегик аҳамиятга эга иншоотларга келадиган хавфнинг олдини олиш муҳимдир.

Оқсув ўзани бўйида жойлашган ер остидан фойдаланувчиларнинг лицензиясини қайтариш ёки бошқа жойга алмаштириш юзасидан тегишли бошқармаларга талабномалар йўлланган. Чунончи, Оқсув ўзани бўйида стратегик аҳамиятга эга 6та иншоот жойлашган. Бу ердаги 4та саёз конларда ишлар давом эттирилмоқда. 

Кун тартибидаги масала юзасидан туман тадбиркорлик бўлимининг раҳбари А. Усипбеков ва ер муносабатлари бўлими раҳбари Н. Абилғазиев маъруза қилди. 

Туман ҳокими У. Садибеков бўлим раҳбарларига аниқ топшириқлар бериб, унинг ижроси назоратини ўринбосари Ш. Убайдуллаевга юклади. 

Шунингдек, мажлис иштирокчиларини масаланинг ижобий ҳал этилишида ўз ваколатлари доирасида ҳисса қўшишга чақирди.