Гулзода Рашидова Кентов шаҳри, Қорачиқ қишлоғидаги Музаффар Умаров раҳбарлик қилаётган “Қорачиқ” ўрта мактабининг 11-синфида ўқийди. Отаси Ирисқул, онаси Насиба фарзандининг ўқишига алоҳида эътибор қаратади.

Бутун дунёга хавф солаётган юқумли касаллик туфайли мактабларда ўқув онлайн шаклда олиб борилаётганига қарийб бир йил бўлди. Бу даврда Гулзода кўпроқ мустақил тартибда билим олишни давом эттирди. 

Компютер материалларидан унумли фойдаланди ҳамда “Элбоши медали” лойиҳасидаги ижтимоий тармоғидаги бешта йўналиш бўйича пухта тайёрланиб, бажарган ишлар бўйича ахборот бериб борди . Булар қуйидаги йўналишлар: 

1. Спорт. 2. Китоб ўқиш. 3. Ўз қобилиятини намоён этиш. 4. Миллий урф-одатлар. 5. Кўнгиллилар сафидаги фаолият. 

 Бунда кунига спорт билан шуғулланиб, оила аъзоларини ҳам жалб этди. Одатдагидан кўпроқ китоб ўқиди, қандолатчилик ва таом тайёрлаш маҳоратини намойиш этди, Б. Сўқпақбаевнинг “Ўлганлар қайтиб келмайди”, Ж. Аймаутовнинг “Қари хўжа”, шунингдек, М. Лермонтов поэзияси билан пухта танишиб, бугуннинг долзарб мавзуси бўлган П. Друирнинг “Ҳар кунги ёки 366 керакли маслаҳат мени кутмоқда” китобларини қунт билан ўқиб чиқди.

 Ўқувчилар мактабга карантин туфайли келмаган уч ой давомида  уч нафар мактаб остонасига энди қадам  қўйган болаларга карантин чораларига амал қилган ҳолда онлайн маслаҳатлар ёрдамида ҳарф ўргатди. Ва бу ишларини видеотасвирга тушириб, керакли сайтга жўнатиб турди. “Элбоши медали” бўйича масъул комиссия ушбу материалларни кўриб чиқиб, Гулзода Рашидовани ғолиб деб топди, дипломлар ҳамда сертификатлар билан тақдирлади. 

Бу танловда вилоятимиздан  538 нафар ўқувчи иштирок этиб, Кентов шаҳри ва қишлоқларидан 9 ўқувчи ғолиблар сафидан жой олди. Шулардан бири – Гулзода бронза “Элбоши медали” тури билан мукофотланди. Уни Кентов шаҳри ҳокими Даурен Махажанов тантанали равишда тақдим этди (тасвирда). Баракалла, Гулзода!