– Олдимизда “Мақтаарал” футбол клубини премьер-лигага чиқариш вазифаси турибди, –  деди футбол клуби ўйинчилари билан учрашувда генерал Ҳаким Кўшқалиев.
Туркистон вилоят  футбол федерацияси президенти,  уюшган жиноятчиликка қарши ҳаракатлар департаменти раҳбари Ҳ. Кўшқалиев Мақтаарал тумани ҳокими Б. Асанов билан бирга Атакентдаги “Алпомиш ботир” марказий ўйингоҳида   спортчилар билан учрашди.
Футбол федерацияси президенти вилоят ҳокимининг топшириғига биноан футбол ривожига алоҳида эътибор қаратиб келмоқда. Биринчи лигада ўйин кўрсатадиган “Мақтаарал” яхши кўрсаткичларга эришмоқда. Тажрибали мутахассис Воҳид Масудов мураббийлик қилаётган ушбу жамоа бу йил биринчи лига клублари орасида ўтадиган ҚР биринчилиги олдида уч босқичдан иборат ўқув машғулотларини ўтказди. Шунингдек, бир неча бор тажрибали жамоалар билан дўстона учрашувларда иштирок этиб, юксак  натижаларга эришди. Хуллас,  мақтаараллик футболчилар 2021 йилги футбол мавсумига шай.
  Мирзакентдаги янгидан  таъмирланган Қ. Мунайтпасов номидаги марказий стадионда ҳам учрашув ўтди. Унда   нафақат футбол турнирлари, балки маҳаллий футболга оид муаммолар ҳам муҳокама қилинди.