Ўттиз йиллик шонли сана билан таҳририят жамоасини қутлаш учун ташриф буюрган “Чимкент” ижодий уюшмаси аъзоси, шоир, ёзувчи, Қозоғистонда хизмат кўрсатган металлург Турдали ота Усмановнинг дил изҳорлари ва совғалари барчани хушнуд этди.
– “Жанубий Қозоғистон” вилоят газетаси халқимизнинг ифтихори, маслаги, кўзгусидир. У нафақат вилоятимизда, балки республикада ҳам ўз мавқеига эга нашрлардан биридир. Мен газетанинг ҳар бир сонини интизорлик билан кутаман. Бугунги кунда жамиятимизда содир бўлаётган воқеалар, янгиликлар газетанинг ҳар бир сонида мухбирлар томонидан кенг ёритиб борилмоқда.  
Рўзнома том маънода халқ минбарига айланди.
Газетамиз саҳифаларида “Орамиздаги одамлар”, “Турмуш чорраҳаларида”, “Соҳир туйғулар” рукни остида қалам тебратаётган мухбирлардан Шомирза Мадалиев, Баҳорой Дўсматова, Мухтабар Усмонова, Саодат Шарифбоева, Хуршид Қўчқоров, Наргиза Мавлонова, Мунира Саъдуллаева каби фидойи журналистларнинг фидойи хизмати беқиёсдир. Газетанинг юксак савияда  ва ранг-баранг чиқишида бош муҳаррир Алишер Сотволдиев, муҳаррир ўринбосарлари Муроджон Абубакиров, Авазхон Бўронбоев, масъул котиба Шаҳноза Усманова, мусаҳҳиҳа Гулмира Ашурматова, безакчилар – Одилжон Мўминжонов, Собир Исаметовларнинг меҳнати ҳам таҳсинга лойиқ.
Газетхонларга юксак тафаккур, журналистларга ўткир қалам тилаб қоламан,  – деди Турдали Усмонов.