Туркистонда Евроосиё Бутунжаҳон мероси шаҳарларининг халқаро анжумани ўтди

Туркистон шаҳри Евроосиё Бутунжаҳон мероси шаҳарлари рўйхатига расман қабул қилинди. Шу муносабат билан ташкилотнинг Х юбилей анжумани яқинда туркий оламнинг маънавий пойтахти мақомини олган Туркистон шаҳрида ўтказилди.

Унда сўз олган Туркистон шаҳри ҳокими Рашид Аюпов жорий йил Қозоғистон Республикаси Мустақиллигининг 30 йиллиги арафасида ўтаётган тадбирнинг аҳамиятига тўхталди. Ушбу анжуманга қизиқиш билдирган ва иштирок этган дунё мамлакатларининг Евроосиё Бутунжаҳон мероси шаҳарлари рўйхатига кирган давлатлар вакилларига миннатдорчилик билдирди.
Анжуманда тарихий ва маданий қадриятларни сақлаш бўйича илғор тажрибага эга бўлган Эрон, Россия, Сербия, Туркия, Польша, Юнонистон, Индонезия, Германия, Марокаш, Албания, Қирғизистон, Ўзбекистон ва Хитой каби 23 мамлакатдан 50дан зиёд шаҳар вакиллари иштирок этишди.
Онлайн анжуман доирасида қадимий мерос ва маданиятни асраб-авайлаш, сайёҳликни ривожлантириш, шаҳарни ободонлаштириш, янги иншоотлар қурилиши шароитида унинг тарихий жозибадорлигини сақлаб қолиш масалалари муҳокама қилинди.
Туркистон шаҳри ҳокими ўз маърузасида сайёҳлик соҳасини ривожлантириш, туризм ва маданият соҳасида таҳсил олаётган талабаларнинг ўзаро тажриба алмашишлари учун шароит яратишда Евроосиё Бутунжаҳон мероси шаҳарлари ўртасидаги ҳамкорликни кучайтириш ташаббуси билан чиқди.
Тадбир якунида , Евроосиё Бутунжаҳон мероси шаҳарлари ташкилотининг Х Халқаро конференциясининг декларацияси қабул қилинди.