Х. А. Яссавий  номидаги Халқаро қозоқ-турк университетида  чет эллик олимлар, археологлар иштирокида «Туркистон – 3000 ёшда» мавзуида давра суҳбати уюштирилди.
 Учрашувда Туркистон вилояти ҳокимининг ўринбосари Сакен Қалқаманов, университет раҳбари Жанар Темирбекова, тарих фанлари доктори, Қозоғистон Республикаси А. Марғулан номли МФА  академиги ва Археология институтининг бош директори. Бауржан Байтанаев,  Қозоғистон Республикаси Жаҳон мероси миллий қўмитаси раисининг ўринбосари Дмитрий Воякин, академик, З. Буниятов номидаги Шарқшунослик институти директори ўринбосари   Шоҳин Мустафаев, Вашингтон университети Антропология кафедраси профессори Сент-Луис Майкл Фрачетти, Татаристон Фанлар академиясининг мухбир аъзоси,  А. Халиқов номидаги   археология институти директори  Айрат Ситдиқов ва бошқалар иштирок этди.
Мақсад –  Туркистоннинг 3000 йиллиги ҳақидаги тарихий маълумотларни жамоатчиликка эълон қилиш.
 – Туркистон қадимий ва буюк шаҳар. Ушбу ноёб шаҳарнинг тарихи қадимги даврлардан, кўп асрлар муқаддам  бошланган. 1990-2000 йилларда биз Туркистоннинг 1500 йиллигини нишонладик. Аммо ўшандан бери кўп вақт ўтди. Биз ушбу санани нишонлаган даврдаги маълумотлар Совет Иттифоқи даврига тегишли бўлиб, Қозоғистонда  шу  йилларда ҳеч қандай жиддий  тадқиқот олиб борилмаган, энг қизиғи қадимий Туркистоннинг уйғониш даври ўзига хос чуқур тарихга эга. Бинобарин, қабилалар бу ҳудудда милоддан аввалги XV асрда яшаган. Туркистон ҳудудидаги археологик мажмуаларни ўрганиб, иккита қадимий қабристонни топдик.
Бу ерда топилган дафн маросимлари ва буюмлари, шубҳасиз, милоддан аввалги XV асрга тегишли, –  деди учрашувда Бауржан Байтанаев.
– Мустақиллик йилларида миллий ва маънавий қадриятларимизни тиклаш, ўрганиш ва тарғиб этиш, маданий ёдгорликлар, муқаддас қадамжоларни асраб-авайлаш, уларни асл қиёфасига мос тарзда белгиланган меъморий талаблар асосида қайта тиклаш ва таъмирлаш бўйича кенг кўламли ишлар бажарилди ва бу эзгу ишлар изчил давом этмоқда,– деди Жанар Темирбекова. – Туркистон ўзининг бой номоддий мерос иншоотлари – кўп асрлик осори-атиқалари, ноёб меъморий обидалари, ҳунармандчилиги, дунё илм-фанига беқиёс ҳисса қўшган алломалари билан машҳур.
Бу йўналишдаги эзгу саъй-ҳаракатлар тарихимизни мукаммал ўрганиш, жаҳон илм-фани ривожига улкан ҳисса қўшган улуғ мутафаккирларимизнинг ҳаёти ва фаолиятини чуқур тадқиқ этиш,  маънавиятимизни юксалтириш, ёш авлодни Ватанга муҳаббат, тарихимизга ҳурмат-эҳтиром руҳида вояга етказишда муҳим аҳамият касб этади.
Давра суҳбати иштирокчилари  қадим шаҳардаги ёдгорликларнинг ҳали фанга номаълум қирралари ўрганилиб, хусусан  Туркистон  тарихини жаҳонга намоён этиш зарурлигини таъкидладилар.
Учрашув якунида университет раҳбари меҳмонлар ва олимларга таълим муассасаси номидан «Х. А. Яссавий ҳикматлари»  китоби ва лоланинг «Президент Назарбаев» навидан тайёрланган  гулдаста  туҳфа қилди.