12та жамоат кенгаши сайловолди дастури ижросига ҳисса қўшади

Туркистонда Nur Otan партияси вилоят филиали Сиёсий кенгаши бюросининг мажлиси ўтди. Уни Туркистон вилояти ҳокими, партиянинг вилоят филиали раиси Ўмирзақ Шўкеев раислик қилиб, олиб борди.

Кун тартибида учта масала муҳокама қилинди. Улар – бошланғич партия ташкилотларининг ҳисобот йиғинлари ва ҳудудий, минтақавий партия филиалларининг ҳисобот бериш-сайлов анжуманларини ўтказиш муддатини тасдиқлаш, партиянинг сайловолди дастури йўналишлари бўйича ҳудудий Жамоат кенгашлари раислари ва таркиби, низомларини тасдиқлаш масалалари.
Бундан ташқари, Nur Otan партияси вилоят филиалининг навбатдаги XLI ҳисобот-сайлов конференциясини чақириш масаласи муҳокама қилинди. Бюро аъзолари мазкур масалаларни тасдиқлаб, қарор қабул қилди. Унга мувофиқ, 19-23 апрель оралиғида бошланғич партия ташкилотларининг ҳисобот-сайлов йиғинлари, 26-30 апрель кунлари партиянинг ҳудудий филиалларида навбатдаги ҳисобот-сайлов конференциялари онлайн шаклда ўтади.
Вилоят ҳокими, партия филиали раиси Ўмирзақ Шўкеев Nur Otan партиясининг “Ўзгаришлар йўли: ҳар бир фуқарога муносиб ҳаёт!” мавзуидаги сайловолди дастурини амалга ошириш йўналишидаги ишлар кучайтирилишини таъкидлади. Натижада, партия филиали қошидаги Жамоат кенгашлари сони ортиб, таркибига обрў-эътиборли фуқаролар киритилишини маълум қилди.
– Nur Otan партияси вилоят филиали қошида 12та Жамоат кенгаши тузилмоқда. Уларнинг таркибига 128 нафар минтақага, республикага таниқли, ишбилармон, фидойи шахслар киритилмоқда. Янгидан ташкил қилинган кенгашлар сайловолди дастурининг ижросини назорат қилиб, асосий масалаларнинг вақтида ҳал этилишига ҳисса қўшадилар, – деди Ўмирзақ Естайули.
Nur Otan партияси вилоят филиали раисининг биринчи ўринбосари Бейсен Тажибаев халққа берган ваъдалар устидан чиқиш, сайловчилар ишончи оқлаш – партиянинг устувор вазифаси эканини таъкидлади.
– Партия қошида тузилган Жамоат кенгашлари ғоялар ва фикрлар муҳокама қилинадиган майдонга айланди. Дастурлар ва режаларнинг сифатли ижросини назорат қилиб, вақтида ижро органларига муҳим таклифлар бера оладиган бундай кенгашлар фуқаролик жамиятини ривожлантиришга ижобий таъсир кўрсатади, – дея Б. Тажибаев Жамоат кенгаши раисларини таништирди.
Жамоат кенгашлари вилоят маслаҳати депутатлари, партиянинг кадрлар захирасида турган номзодлар, жамоат ва партия фаоллари, зиёлилар, табиат жонкуярлари, нодавлат ташкилот, ОАВ, таълим, соғликни сақлаш ва бошқа соҳа вакилларидан иборат.
Вилоят бўйича партия филиаллари қошида 146та Жамоат кенгаши тузилган. Ундан 12таси вилоят партия филиали қошида бўлса, 134таси ҳудудий филиалларда фаолият юритади.
Туркистон вилоят маслаҳати котиби Қайрат Балабиев вилоятда партиянинг Йўл харитаси доирасида ишлар режага мувофиқ амалга оширилаётгани, сайловолди дастурини бажариш партия назоратида эканлигини таъкидлади.
Вилоят ҳокими Ўмирзақ Шўкеев Туркистон вилоятини ривожлантириш йўналишидаги тадбирлар суръатини оширишни топшириб, мажлисга якун ясади.