Чордара шаҳрида “Шардара Армспорт vs Әлем құрамасы” орасида беллашув ўтди. Мазкур нуфузли мусобақада Жаҳон терма жамоаси таркибида Россия, Грузия, Латвия, Украина, Ўзбекистон мамлакатларидан келган Жаҳон, Европа, Осиё чемпионлари кучларини синашди.
Жаҳон спорт жамоатчилигининг эътиборини ўзига қаратган дастлабки беллашув 57 кг. вазнда омадини синаб юрган чордаралик Нурмахан Ердаулет ва россиялик Аҳмад Айбазов орасида ўтди. 5 раундлик беллашувда ҳамюртимиз 5:0 ҳисобида рақибидан устун келди.
70 кг. вазнда “Shardara.Armsport” клуби спортчиси Қадир Нурдаулет грузиялик Вилени Габравани қизиқарли кечган баҳсда 4:1 ҳисобида мағлубиятга учратди. 78. кг. вазнда куч синашган Айдархан Нурдаулет украиналик рақиби Роман Мантикага имконият қолдирмади.
86 кг. вазндаги полвонлар орасида ўтган беллашувда Талғат Ақтаев латвиялик спортчи Владислав Красовскийдан устун келди. Энг оғир вазндаги (95 кг.) мусобақада Қаржау Есбўлат ўзбекистонлик Жасур Алиакбаровни мағлубиятга учратди.
Мусобақа якунига кўра,”Шардара Армспорт” клуби Жаҳон терма жамоасидан 5:0 ҳисобида устун келди.
Шуни таъкидлаш жоизки, яқин келажакда чордараликлар Осиё, Европа терма жамоалари билан ҳам беллашади.