Вилоятимизда яхши ва қониқарли ҳолатдаги автомобиль йўллари 5 йилда 99,5 фоизга етказилади. Вилоятдаги умумий фойдаланишдаги автомобиль йўллари ва аҳоли манзиллари кўчаларининг сифатини яхшилаш масаласи вилоят ҳокими Ўмирзақ Шўкеев назоратида.
Туркистон вилоятида келгуси 5 йилда 2,3 минг чақирим йўл қурилиб, таъмирланади. Минтақа ижтимоий-иқтисодий тараққиётининг 2021-2025 йилларга мўлжалланган Мажмуавий режаси доирасида жануби-ғарбий айланма йўли, Туркистон – Шимкент – Тошкент тезюрар темирйўл магистрали қурилади.
Вилоятимизда йил охиригача яхши ва қониқарли ҳолатдаги вилоят ва туман аҳамиятига молик автомобиль йўлларининг улушини 79 фоиздан 81,4 фоизга ошириш кўзланган. Бу кўрсаткични 2025 йилгача 90 фоизга етказиш режаланган.
Жорий йилда автомобиль йўлларини таъмирлашга ажратилган маблағнинг асосий қисми маҳаллий аҳамиятга эга йўлларга йўналтирилади. Қурилиш-таъмирлаш ишлари билан 300дан зиёд иншоот ёки 1200 чақиримга яқин йўл ва кўчалар қамраб олинади. Йил поёнигача 700 чақирим йўл фойдаланишга берилади.
11та вилоят аҳамиятига эга автомобиль йўли таъмирдан чиқарилади. Бу ишлар Қазиғурт, Тулкибош, Сўзоқ, Байдибек туманлари ва Арис шаҳрида олиб борилмоқда. Оқсувкент – Қорамурт, Шимкент – Сайрам, Шимкент– Кўксаёқ йўналишидаги 50 чақирим йўл жорий ва тубдан таъмирланмоқда. Янгиланган йўллар сентябрь ойигача фойдаланишга берилади.
Ўрдабоши туманининг Темирлан – Қизилсенгир, Қайнар – Уялижар, Бадам – Шубар йўналишидаги 68,4 чақирим йўл жорий таъмирдан ўтказилади.