Сайрам туманидаги 42та аҳоли манзилининг 26таси табиий газ билан таъминланган. Бугунги кунда яна 7та аҳоли манзилида газ тармоқларининг қурилиш ишлари ниҳоясига етказилди, 5та қишлоқда шундай ишлар олиб борилаётган бўлса, 4та аҳоли манзилининг лойиҳа-смета ҳужжатлари тайёр. Чунончи, Кўлкент, Ақарис, Ўймаут, Сариариқ аҳоли манзилларига газ таъминоти тизимини қуриш учун лойиҳа-смета ҳужжатлари тайёрланиб, давлат таҳлилининг натижаси олинди.
Бугунги кунда вилоят энергетика ва уй-жой коммунал хўжалиги бошқармасига ариза берилиб, тегишли маблағни ажратишга келишилди. Бу маълумотни туман уй-жой коммунал хўжалиги бўлими раҳбари Жангелди Абданбеков матбуот анжуманида маълум қилди.
Сув масаласига келсак, Айтекебий қишлоғи аҳли хусусий тадбиркорнинг қудуғи ва сув минорасидан фойдаланади. Қишлоқдаги сув тармоғи эскирган. “Сув захиралари Маркетинг” МЧБ тасарруфидан коммунал мулкка олинган сув қудуғини ишга тушириш учун смета ҳужжатлари тайёрланиб, зарур маблағ – 40,4 млн. тенге ажратилди. Давлат хариди танлови натижасига кўра, пудратчи компания “Vek Stroi” МЧБ ғолиб бўлиб, қурилиш ишларини бошлаб юборди.
Матбуот анжуманида бўлим раҳбари ҚР Ҳукуматининг “Уй-жой коммунал хўжалиги тараққиётининг 2020-2025 йилларга мўлжалланган “Нурли ер” давлат дастурини тасдиқлаш тўғрисида” қарори талаблари доирасида харид қилинган 31та уйни тумандаги давлат уй-жой жамғармасидан бошпанага навбатда турган 31 нафар кўп болали муҳтож оилага сотиб олиш ҳуқуқисиз берилганини маълум қилди.