Арис шаҳридаги Ергўбек Маданият уйида “Туркистон тўрида: Қозоғистон Мустақиллигига 30 йил ва Элбошининг роли” мавзуида маданий тадбир ўтди.

Унда ҚР фахрийлар уюшмаси раиси, давлат ва жамоат арбоби Ўмирзақ Ўзғанбаев етакчилигидаги бир гуруҳ зиёлилар ва шаҳар ҳокими Гулжан Қурманбекова иштирок этди.
Учрашувда Ў. Ўзғанбаевнинг “Россия Давлат Думаси ва Қозоғистон” номли беш жилдли китобининг тақдимоти ўтди. Оқсоқол рисолада узоқ йиллар Элбоши Нурсултан Назарбаев билан бирга фаолият юритгани ҳақида баён қилиб, Тўнғич Президент ҳақидаги хотираларини ифодалаган. Муаллиф  Қозоғистоннинг бош шаҳри, пойтахтини Алматидан Астанага кўчириш борасидаги тарихий қарорига оид маълумотларни келтирган.
Арис шаҳри ҳокими Г. Қурманбекова олимни янги меҳнат маҳсули билан муборакбод этиб, республика фахрийлари кенгаши раиси сифатида олиб бораётган фаолиятини ҳам муносиб баҳолади.
Маданий тадбирдан сўнг меҳмонлар Арис шаҳрида очилган “Фахрийлар маркази” ва “Тенг жамият” ижтимоий маркази фаолияти билан танишишди.