Арис шаҳрида эҳтиёжмандларга мўлжалланган ижтимоий дўкон иш бошлади. Бу ерда озиқ-овқат ва кийим-кечакдан тортиб, то маиший техника сингари буюмлар ҳам бепул тарқатилади.
Шаҳар тарихида илк бор очилган “Ижтимоий дўкон” муҳтож оилалар эҳтиёжини қондириш учун хизмат қилади. Савдо ўрнининг очилишида Арис шаҳри ҳокими Гулжан Қурманбекова, зиёлилар ва шаҳарликлар иштирок этишди.
– Шаҳримизда илк бор очилган дўкон “Қўлғабис” жамоат жамғармасининг ташаббуси билан ташкил қилинди. Сахий инсонлар кўмагида олинган буюмлар дўкон ходимлари томонидан муҳтожларга тақсимлаб берилади, – деди Г. Қурманбекова.
“Қўлғабис” жамоат жамғармаси етакчиси Сирлибек Мусабековнинг айтишича, дўкон эшиги кўп болали оилалар, имконияти чекланган фуқаролар, бева аёллар учун ҳамиша очиқ.
Шуни таъкидлаш жоизки, тадбиркорлар ва жамоат фаоллари кўмагида иш бошлаган лойиҳа доирасида 3 киши доимий иш билан таъминланди.