Алматидаги ҚР Мудофаа вазирлигининг Ҳарбий-тиббиёт марказида Қозоғистон ва АҚШ Мудофаа вазирликлари ўртасидаги халқаро ҳамкорлик доирасидаги дала госпитали фаолияти тўғрисида маълумотлар алмашилди.
Америкалик мутахассислар экспедициявий (ихтисослашган шошилинч тиббий ёрдам кўрсатиш ва жабрланганларни тиббий ёрдамнинг кейинги босқичига эвакуация қилишга тайёрлаш) тиббий ёрдам борасида тажрибалари билан ўртоқлашдилар.
Қозоғистон томонидан тинчликпарвар ҳарбий-дала госпитали таркибига кирувчи тиббиёт мутахассислари иштирок этди. Ходимлар Қозоғистон тинчликпарварлик полкининг ўқув марказида БМТ андазаларига мувофиқ тинчликпарварлик курсларини ўташди. Бундан ташқари, Ҳарбий тиббиёт маркази тиббиёт ходимлари учун махсус тиббий тайёргарлик курсларини ўтказди.
Қозоғистон Қуролли Кучлари Ҳарбий Тиббиёт Бош Бошқармаси бошлиғи полковник Тимур Ўшақбаевнинг сўзларига кўра, сайёр тиббий ёрдамдан фойдаланиш юқори самарадорликка эга ва айниқса, аҳолиси кам, инфратузилмаси чекланган жойларда тиббий, ижтимоий ва иқтисодий таркибий қисм сифатида ҳам қизиқиш уйғотади. Шунингдек, Қозоғистон ҳарбий-дала тиббиёт мутахассисларининг халқаро курсларда иштирок этиши ва маълумотлар алмашинуви тинчликпарвар контингентнинг БМТ миссияларида иштирок этиш учун сифатли ва ҳар томонлама тайёрланишига ёрдам беради.
Эслатиб ўтамиз, Қозоғистон Қуролли Кучларининг БМТ тинчликпарварлик салоҳиятини тайёрлаш тизимидаги иштирокини кенгайтириш юзасидан ташаббуслар доирасида тўртта ихтисослаштирилган бўлинма рўйхатдан ўтказилди. Улар ҳарбий-дала госпитали, муҳандислик тадқиқот гуруҳи, ҳарбий полиция бўлими ва разведка бўлими. Унинг таъкидлашича, БМТнинг ҳарбий тиббий бўлими тинчликпарварлик миссияларида иштирок этиш учун энг зарур қисмлардан биридир.