Жорий йили Мақтаарал, Жетисай туманларида 135,2 минг га. обикор ерга қишлоқ хўжалиги экинлари экилди. Унинг 77,5 гектари пахта. Бир кунда 2 минг гектар, жами 17 минг гектарга яқин пахта майдони суғорилмоқда. Бугунги кунда Мақтаарал туманининг деҳқон хўжаликлари 30 фоиз, Жетисай тумани хўжаликлари 10 фоиз экинларини суғориш имконига эга бўлишди.

Аммо, жорий йилнинг 1 августидан бошлаб Ўзбекистон Республикасидан давлатлараро Дўстлик магистрал каналидан келадиган сувнинг ҳажми камайиши кутилмоқда. Шу сабабли, ушбу туманларнинг хўжаликлари сувдан унумли фойдаланиб, суғориш ишларини жадал юритиши зарур. Бу масала Туркистон вилояти ҳокими Ўмирзақ Шўкеевнинг Мақтаарал, Жетисай туманларига хизмат сафари доирасидаги деҳқонлар билан учрашувда муҳокама қилинди.
– Энг муҳими – тотувлик. Туманда аҳиллик бўлса, бир-биримизни қўллаб-қувватласак, оқсоқоллар бор, фаоллар бор, депутатлар бор, ҳокимлар бор, қийинчиликларни бартараф этамиз. Ҳамжиҳатликда меҳнат қилмасак, ҳеч қандай тирикчилик битмайди. Бирлашсак, сув ҳам бўлади, пахта ҳам бўлади, гуруч ҳам бўлади, – деди вилоят ҳокими учрашувда.
Трансчегаравий Дўстлик магистрал канали суви билан Мақтаарал, Жетисай туманларидаги 136 минг гектар обикор ерлар суғорилади. Июль ойида Тошкент шаҳрида ҚР Экология, геология ва табиий захиралар вазири М. Мирзағалиев Ўзбекистон Республикасининг Сув хўжалиги вазири Ш. Ҳамроев билан учрашган эди. Унда давлатлараро Дўстлик канали суви миқдорини 80 м3/с.дан 90м3/с.гача кўпайтиришга келишилди.
Ҳозирги кунда Дўстлик каналидан 92 м3/с. сув ўтказилмоқда. Шунингдек, хўжаликларни тўлиқ сув билан таъминлаш учун Чордара сув омборидан қўшимча 10м3/с. оқар сув бериляпти.
Сафар давомида минтақа раҳбари туманнинг ижтимоий-иқтисодий аҳволи билан танишди. Вилоят ҳокими Мақтаарал қишлоқ округидаги узумчилик хўжалигида бўлди. 60 гектар узумзорда меванинг турли навлари етиштирилмоқда.